LUKU 18:25-35

²⁵Lakumi gɛ̃na pↄrↄwɛɛn araga de aruzɛkɛde gɛ̃na kpata kũ à bò Luda kĩnaa gũnla.

²⁶Akũ gbɛ̃ kũ ò yã pìi mànↄ pì: Tó lɛmɛ, dí mɛ́ ani fↄ̃ à surabana lee?

²⁷Yesu wèḿma à pì: Yã kũ bisãsiri fùa à kɛ, Luda kĩnaa àdi sí kɛ.

²⁸Akũ Pita pì: O beebↄ pínki tò o tɛnyĩ.

²⁹Akũ Yesu pìńnɛ: Yãpuran matɛn oárɛ, gbɛ̃ kũ à a bɛ tò ke a nanↄ ke a vĩ̀ninↄ ke a dakũnanↄ ke a de ke a da ke a nɛ́nↄ kpata kũ à bò Luda kĩnaa yãi,

³⁰ade ni ɛra à abire taka le de yãla dasidasi andunia dí gũn, ani wɛ̃̀ndi kũ àdi lákaro le andunia kũ àtɛn su gũn.

³¹Yesu a gbɛ̃nↄn kuri awɛɛplanↄ kàkaraai, akũ à pìńnɛ: Ótɛn gɛ́ Yurusalɛmu. Gwen yã kũ annabinↄ kɛ̃̀ Luda yãn Bisãsiri Nɛ́ musu ni papan pínki sà.

³²Oni a kpá buri pãnde gbɛ̃nↄa, oni a fobo, oni a sↄ̃sↄ̃, oni lɛ́'i sua, oni a gbɛ̃ kũ flã̀ao, oni a dɛ,

³³a gↄrↄ aakↄ̃de zĩ ani futɛ.

³⁴Ama a ìbaa pìnↄ dí a ke mì dↄ̃ro, zaakũ yã pìi mì utɛnańnɛ, ò dↄ̃ yã kũ àtɛn oro.

³⁵Kũ Yesu kà kãni kũ Yɛrikoo, vĩ̀na ke vutɛna zɛ́ lɛ́a, àtɛn bara kɛ.