San Lucas 18:25-35

²⁵Bedao'ch te to be xen be nzi' camello to ḻo' nag yeše' clel ca to beṉe' gwṉi'a gwzenague' c̱he Diosen' cont Diosen' ṉabi'e yic̱hjlažda'ogüe'.

²⁶Na' beṉe' ca' bosozenague' xtiže'na' gose'ene': ―¿Noxen' šjayzoa len Diosen' še ca'?

²⁷Na' Jesúsen' gože' ḻegaque': ―Da' bi gac gon beṉac̱hen', bitw ṉacho bi gac gon Diosen' ḻen.

²⁸Nach Pedroa' gože' ḻe': ―Neto' ba gwlejyic̱hjto' yogo' da' de c̱heto' cont nacto' le' txen.

²⁹Na' gož Jesúsen' ḻegaque': ―Da' ḻi žia' le'e, note'teze beṉe' ba gwlejyic̱hje' liže', x̱axṉe'e, biše', xo'ole' o xi'iṉe' ṉec̱he chzenague' c̱he Diosen' cont Diosen' chnabi'e yic̱hjlažda'ogüe',

³⁰yežlio nga yonežjo Diosen' ḻe' da' nac da' zaca'ch, na' cate' yežine' yaban' gata' yeḻa' mban c̱he' toḻi tocaṉe.

³¹Na' gwlejiže Jesúsen' beṉe' šižiṉw ca' gwleje' cont zjanaque' txen len ḻe' na' gože' ḻegaque': ―Ṉa'a ba zejcho Jerusalénṉa' gan' gac yogo'ḻoḻ dan' nyoj c̱hia' dan' bosozoj da' beṉe' ca' gosoe' xtiža' Diosen' cani', neda' naca' bena' gwseḻa' Diosen' golja' beṉac̱h.

³²Gaca' ḻo na' beṉe' ca' bi zjanac beṉe' Israel, na' yesezi'diže' neda', na' yeseṉe' yeḻa' ya' c̱hia', nach yosoži'e xene' cho'alagua'.

³³Yesot yeseyine' neda' na' yesote' neda', perw yeyoṉ ža yebana' ladjo beṉe' guat ca'.

³⁴Perw beṉe' ca' zjanaque' Jesúsen' txen bi gosejni'ide' dan' gože' ḻegaque', ḻe zjanc̱hoḻ yic̱hjlažda'ogüen', da'nan' bi gosejni'iden'.

³⁵Nach cate' ba zoa yežin Jesúsen' Jericó, to beṉe' lc̱hoḻ chi'e chanezen' chṉabe' yosonežjo beṉe' ḻe' con gaca' da' chesezande'.