Sam 90:2-17

²Totoso lopu ele koa sari na toqere, babe lopu ele va podakia Goi sa pepeso meke sa kasia popoa, si Agoi mo sa Tamasa ninae rane ka rane.

³Ele zama ia Goi sa tie pude pule la vasina koana, meke tozi nia Goi si asa pude pule la pa pepeso.

⁴Sa keke tina vuaheni si guana keke rane mo koa Goi, guana norae mo si arini totoso hola rini, babe guana keke totoso papakana mo pana boṉi.

⁵Lopu sana vagi pani Goi sari na mami tinoa; guana pinutagita mo sa mami tinoa, na duduli mo sapu lovuru pana munumunu,

⁶toa valeana meke havoro valeana, ba mate harahara pana veluvelu.

⁷Tava mate palae si gami pa Mua binugoro, meke va tarazuzu gami Goi pa Mua tinaṉaziri.

⁸Ele vata dogoro vura ni Goi pa kenumu sari na mami sinea, meke sari na mami sinea tomedi si va vurai Goi pa kalalasa.

⁹Sa mami tinoa si tava papaka pa Mua binugoro, meke sari na vuaheni mami si tava hola taloa guana keke siniṉo mo.

¹⁰Pada zuapa ṉavulu vuaheni mo sari na mami tinoa, ba be ṉiṉira si gami, si kamoa vesu ṉavulu, ba koai na ṉinarezo, na tinasuna si arini, lopu sana murimuri taloa si gami.

¹¹Loke tie si boka va nonoga ia sa doduruna sa ṉiniraṉirana sa Mua binugoro, loke tie boka gilania sa minatagutu sapu padana sa Mua tinaṉaziri.

¹²Mu va tumatumaeni gami sapu papakadi gua rina mami tinoa, pude mami tumatumae pa bulomami.

¹³Ve seunae gua kaqu koa hola sa Mua binugoro? Kei Zihova, Mu tataru ni na va manoti sari na Mua nabulu.

¹⁴Mu va siṉini gami sa Mua tataru nabuna doduru munumunu, pude mami kera qetuqetu pa doduru mami tinoa.

¹⁵Mu va qetuqetu gami, koari na totoso geledi gua tugo sapu va talotaṉa gami Goi koari na mami vuaheni tasunadi.

¹⁶Mu vata dogoro ni koa gami sari na Mua tinavete ṉiṉiradi, va dogoro ni koari na tumami vugo na repere sa Mua ṉiniraṉira.

¹⁷Zihova mami Tamasa, Mu manani gami, Mamu va bokaboka gami koari doduru mami tinavete!