Buka Linge 90:2-17

²I naghona to gonighi na lei ghotu, po gonia na pari mana maramana ighoe to God haia tua.

³Ighoe to bosa vanighai ge kai oli tana hava tai va butu mai ga, mo riu olighai tana pughu ni pari.

⁴Na togha ni niulu te vaghaa sakai na bongi vamua itamua, E vaghara i bongi vamua, te tona padi tua me vaghaa na bona ni aho kukulu tana bongi.

⁵Ighoe to lavikehaghai vaghaa na tave ni beti te mua kabu hau, Tai vaghaa na buburu te suaka dato mai tana roropo.

⁶Tana roropo te totobo dato mai me kotukotu, mi tana nulavi te sasagha me mate.

⁷Nimua na rutu te durakeghai, mi ghai tai mataghunia na reirei ni matamu.

⁸Ighoe to talutatei na lei palumami tai mata poloi, gaighi to righighi mai so.

⁹Na lei bongi ni volamami te kubolu horu mai, na pukuna nimua na rutu, me tovongo taghai vaghaa na ahu te ghurihia.

¹⁰Te saravia vamua tana vitu hangavulu na niulu, ma hei te laga te saravia e alu hangavulu na niulu. Hauva, ma ra heghai vamua na vahola mana dikalio me mua daro bona ma Ai mate tua.

¹¹A hei te vadangia na mataghu te heghai nimua na rutu? A hei te ghilalaa na mataghu te neghai to rutu vanighai?

¹²Ko taraighai ge kai ghilalaa na kukuluna na volamami te mua daro, keri vaho ge kai manahagha.

¹³Lord, ivei vaho tua ko nia sara na darona nimua rutu? Ko arovighai ighai na lei nimua na vure ni lutu.

¹⁴Ko kutighai nia nimua dolo tughu roropo ge kai linge togotogo ta na lei bongi ni volamami.

¹⁵Ko neghai mai ge kai ghoi togotogo ghua murina te kaleghai na dikalio tana lei niulu.

¹⁶Ko tatei vanighai mai ighai nimua na lei ghairau nimua na lei lutu sule! Mana lei vinavahuhumami kara righia nimua rongoragha.

¹⁷God, nimami na Lord, nimua na lei vauto ke kabu itamami! Ko neghai mai ge kai nighi tangomana na lei totobo tai gonighi.