Yaburina 90:2-17

²Benun geyane xa da, benun bɔxɔ xɔnna nun dunuɲa yɛtɛɛn xa da, xabu a fɔlɔni, han to, han habadan i tan nan Ala ra.

³I tan nan muxune raxɛtɛma bɛndɛni, i yi a fala, i naxa, “Adamadiine, ɛ xɛtɛ ɛ kelideni.”

⁴Bayo ɲɛɛ wuli kedenna luxi nɛn i yɛɛ ra yi alo xii keden danguxina, alo kɔɛ kedenna.

⁵I tan nan muxun niin bama, a dangu alo xɔtɔn ma xixɔnla, alo sɛxɛn naxan solima.

⁶Xɔtɔnni, a ɲingi, a sabati, ɲinbanna na maso, a lisi a ra, a xara.

⁷I ya xɔlɔna nxu yigitɛgɛma nɛn, a yi nxu ɲan.

⁸I bata nxu hakɛne sa i yɛtagi. I bata nxɔ wundo yulubine birin sa kɛnɛnni.

⁹Nxu siin ɲanma nɛn i ya xɔlɔn bun ma. Nxu nxɔ siimayaan toon ɲanɲɛ alo kutunna.

¹⁰Yanyina nde nxɔ siimayana, ɲɛɛ tonge solofere nan tun a ra. Xa a xunkuya ayi, ɲɛɛ tonge solomasɛxɛ. Koni lanbaranna nun tɔrɔn nan ne birin na. A ɲanma nɛn xulɛn, nxu faxa.

¹¹Nde nɔɛ i ya xɔlɔn sɛnbɛn kolonɲɛ, a yi i binya lan i ya xɔlɔn yatɛn ma?

¹²Nxu xaran nxɔ siimayaan tɛngɛ, alogo nxu xa sigan ti fe kolonni.

¹³Alatala, i ya xɔlɔn ɲanma waxatin mundun yi? Kininkinin nxu tan i ya konyine ma.

¹⁴Nxu ralugo i ya hinanni xɔtɔn yo xɔtɔn. Nanara, nxu bɛtin bɛ, nxu sɛwa nxu siin birin yi.

¹⁵Nxu bata lu yagini waxati xunkuye. Awa, iki sɛwa ɲɛɛne fi nxu ma nxu naxan xasabi ligaxi tɔrɔni.

¹⁶Nxu tan i ya konyine xa i ya wali gbeene to. Nxɔ diine xa i ya binye magaxuxin to.

¹⁷Marigina nxɔ Ala, i ya fanna xa lu nxu xɔn. Nxɔ wanle rasɔnɔya nxu xa, yandi nxɔ wanle rasɔnɔya nxu xa.