Pisalem 90:2-17

²I mua dau hai nia gonduu mo dau hai henuailala, Goe go di God dee odi, gei go di God e noho dono hagaodi ai, gaa hana hua beelaa.

³Goe dela ne helekai mai gi gimaadou bolo gii hula labelaa gi di gowaa dela nogo iei gimaadou. Goe e huli gimaadou gii hai labelaa nia gelegele.

⁴Nia ngadau e mana i doo baahi le e hai hua be di laangi e dahi, e hai gadoo be anaahi, dela gu doo gi daha, e hai gadoo be di aawaa bodobodo o di boo.

⁵Goe e haga mmaa gimaadou gi daha be di labagee, di waalooloo o madau mouli le e bodobodo hua be di midi. Di waalooloo o madau mouli e hai gadoo be nia geinga tolo ala e tomo aga i di luada,

⁶gaa tomo, ga moholoholo gi daha, ga maangoo hiahi, gaa mmade.

⁷Go do hagawelewele dela e kili iei gimaadou gi daha. Gimaadou gu mmaadagu huoloo i do hagawelewele damanaiee mai gi gimaadou.

⁸Goe guu dugu madau huaidu i oo mua, madau huaidu ala e de gidee, gei Goe e gidee nia maa.

⁹Madau mouli la gu podo mai i do hagawelewele, gei e limalima dono maa gi daha, e hai gadoo be di lee haga moolee.

¹⁰Di waalooloo o madau mouli la nia ngadau hua e mada hidu, e mee di hana e tugi e huowalu maa gimaadou e mouli maaloo, gei di waalooloo o madau mouli ga hidi mai iei gimaadou gaa noho dee baba ge haingadaa. Di mouli e limalima dono hagaodi gei gimaadou ga hagalee.

¹¹Koai gu hagalongo ia i deia di mahi o do hagawelewele? Koai e iloo ia di madagu o do hagawelewele dela ma ga gaamai?

¹²Aago ina mai gi gimaadou be dehee di bodobodo o madau mouli, gei gimaadou ga kabemee.

¹³Dehee di waalooloo o do hagawelewele? Meenei Dimaadua, goe gi hila mai gi gimaadou, go au gau hai hegau!

¹⁴Haga honu ina gimaadou gi do aloho dee odi i nia luada, gii mee ai gimaadou di daahili mo di tenetene i di waalooloo o madau mouli.

¹⁵Gaamai gi gimaadou di noho manawa lamalia, gi tungaadahi gi dau hai dela ne hai gimaadou gi manawa gee i di waalooloo o di madau madagoaa nogo noho i lodo di haingadaa.

¹⁶Dugua mai gi gimaadou, ala go au gau hai hegau, gi gidee gimaadou o hangahaihai mogobuna. Heia madau hagadili gi gidee ginaadou do maaloo madamada.

¹⁷Meenei Tagi go di madau God, dau hagahumalia gi madalia gimaadou. Heia gimaadou gii gila i madau mee huogodoo ala e haihai!