SALMOS 90:2-17

²Hasta quema ayamo tiquinchijchihuayaya tepeme huan tlaltipactli, ta ipa tiitztoc. Pampa ta, tiToteco Dios, amo quema tijpixqui mopejya, huan amo quema tijpiyas motlamiya.

³Ta tijchihua para nochi masehualme ma mocuepaca tlali. Quena, ticamanalti huan tiquijtohua: “Ximiquica anmasehualme.”

⁴Pampa mil xihuitl ta tiquita quen se tonal catli panoc yalohua, o quen elisquía se eyi hora quema se tlamocuitlahuiyaya tlayohua.

⁵Tonemilis motlalojti quen atl catli hualtemo chicahuac ipan se atlajtli. Huan ica se tlatoctzi tiixpolijtehuaj quen se temictli. Nojquiya tiitztoque quen se xihui cuahuitl.

⁶Ica ijnaloc moscaltía huan cahuani, huan ica tiotlac quitzontequij huan huaqui.

⁷Pampa ica mohueyi cualancayo techtlaijiyohuiltía huan techtzontlamiltía.

⁸Totlajtlacolhua huan totlaixpanolhua tlanemijya nestoc moixpa.

⁹Yeca nochi tonali huan nochi xihuitl tijpanoj huejhueyi tlaohuijcayotl, catli ta techtitlanilía ica mohueyi cualancayo.

¹⁰San techcahuilía timasehualme ma tiitztoca setenta xihuitl. Huan catli quentzi más tejtetique san tiquincahuilía ma itztoca ochenta xihuitl. Pero ipan nochi nopa xihuitl san tijpanoj tlaohuijcayotl huan tequipacholi, pampa nochi nopa xihuitl san panotiquisa huan tojuanti san tiixpolijtehuaj.

¹¹¿Ajqueya quimachilía nochi catli tihuelis tijchihuas quema ticualani? ¿Ajqueya tlen tojuanti mitzimacasi quen quinamiqui?

¹²Amo miyac tonali tijpiyaj, huajca technextili quenicatza ma tijchihuaca para amo timotonalpolose, huan para ma tijpiyaca tlalnamiquilistli ipan toyolo nochi tonali.

¹³TOTECO, xihuala huan techtiochihua. ¿Hasta quema tlamis ticualantos? Techtlasojtla tojuanti timotequipanojcahua.

¹⁴Mojmostla ica ijnaloc technextili motlaicnelilis, huan nochi tonemilis timitzhuicatise huan tiyolpactose.

¹⁵Toteco, techmaca paquilistli quen ipatlaca nopa tlaohuijcayotl catli tijpanoque. Huan techcahuili ma tiitztoca ica yejyectzi para miyac xihuitl, quen imiyaca nopa xihuitl quema tijpanoque tlamantli catli fiero.

¹⁶Xijchihua para sempa ma tiquitaca nopa huejhueyi tiochicahual nextili catli tijchihua. Huan toconehua ma quiitaca nochi nopa yejyectzitzi tlamantli san se quen tijchihuayaya achtihuiya.

¹⁷TOTECO, ta titoDios, techtlahuilía ica motlatlanex huan technextilía para techcualita. Techpalehui para nochi catli tijchihuase ma cualquisas huan ma huejcahuas. Quena, Toteco, ma cualquisa nochi catli tomax quichihuas pampa ta techfuerzajmaca.