Sam 148:1-14

¹Mi vahesia se Zihova! Mi vahesia se Zihova, gamu na maṉauru. Vahesia si Asa koari na vasidi ululudi.

²Mi vahesia si Asa, gamu doduru Nana mateana. Mi vahesia si Asa, Gamu doduru Nana qeto minate varipera pa maṉauru!

³Mi vahesia si Asa gamu na rimata na sidara. Mi vahesia si Asa, gamu doduru pinopino ṉedala mia!

⁴Mi vahesia si Asa, gamu na maṉauru ululu mia. Meke gamu na kolo panaulu pa maṉauru.

⁵Mi vahesi gamu sa Pozana e Zihova! Ura zama mo Sa meke ta evaṉa sari doduru.

⁶Pa Nana zinama mo si ta veko si arini pa dia vasina ninae rane ka rane, meke lopu boka va karia rini si Asa.

⁷Gamu pa pepeso, mi vahesia se Zihova! Gamu na kurukuru nomanoma mia pa lamana, meke koari na lamana peava;

⁸gamu na kapi, na ruku aesi, na sinou, na lei, na givusu raneboṉi pu va tabei sari na Nana zinama!

⁹Gamu na toa, na toqere; gamu na vuvua, na huda pa hiqohiqo!

¹⁰Gamu na kurukuru pinomo, na bulumakao; doduru kurukuru ṉame, na kurukuru tapuru!

¹¹Gamu na baṉara pa pepeso, meke sari doduru tinoni, sari na koimata, na tie totoli pa pepeso;

¹²Gamu na koreo vaqura, na vineki vaqura, barogoso, na koburu hitehite!

¹³Mi vahesia gamu sa Pozana e Zihova, ura sa Pozana mo Sa si tava lavata koari doduru pozapoza. Sa Nana tinolava si ululu hola nia sa maṉauru na pepeso.

¹⁴Va ṉiṉirai Sa sari na Nana tinoni, pude sari doduru Nana tinoni si kaqu vahesia si Asa. Tataru ni Sa sari Nana tie Izireli. Mi vahesia se Zihova!