Salmos 148:1-14

¹¡Le güe lá'ana Xránadxu Dios! ¡Le güe lá'ana Xránadxu, le'e, zrale xabáa! ¡Le güe lá'ana Le̱', le'e, zrale dxala!

²¡Le güe lá'ana Le̱', le'e, gubáz chee̱ xabáa chee̱' ca'! ¡Le güe lá'ana Le̱', le'e, benne' zante̱ chee̱'!

³¡Le güe lá'ana Le̱', le'e, gubizra, ne beu'! ¡Le güe lá'ana Le̱', le'e, belaj dxusenile!

⁴¡Le güe lá'ana Le̱', le'e, xabáa ca', ne le'e, nisa zrale láwela xabáa!

⁵¡Le güe lá'ana La Xránadxu, lawe' da gunná bé'ene̱', na' guzúale!

⁶¡Be̱ne̱' súale tu chi'ize, ne chadía chacanna! ¡Bzue̱' chee̱le tu da bdxixruj be'e̱ da quebe te chee̱ na!

⁷¡Le güe lá'ana Xránadxu lu xe̱zr la xu, le'e, bea zri'a zrale lu nísadau', ne xúgute̱ nisa situj,

⁸ne le'e, xesa guziu', ne xiaj xiuj, ne bezxe', ne beuj ca', ne le'e, be' bdunu' ca', dxunle ca gunná be'e̱!

⁹¡Le güe lá'ana Le̱', le'e, xí'adu ca', ne xi'a zri'a ca', ne le'e, xaga zixre ca', ne xaga cedro ca',

¹⁰ne le'e, be̱ xixre' ca', ne bea ca' dxuluxúe bénneache, ne le'e, be̱ snia ca', ne be̱ zaj zua xrila!

¹¹¡Le güe lá'ana Le̱', le'e, benne' wenná bea ca', ne xúgute̱ bénneache, ne le'e, benne' dxelenná be'e̱, ne benne' dxuluchi'e̱,

¹²ne le'e, benne' wegu' ca', ne nú'uladu ca', ne le'e, benne' gula ca', ne bidu ca'!

¹³¡Le güe lá'ana La Xránadxu! ¡Szrénte̱dxa naca La Le̱' ca xúgute̱ la bénneache! ¡Da xabáa chee̱' dxulé'e lau na lu xe̱zr la xu, ne xabáa!

¹⁴¡Le̱' nune̱' xe̱zr chee̱' xe̱zre wal-la! ¡Le güe lá'ana Le̱', le'e, bénneache chee̱', nácale zri'ine zre sua Israel! ¡Nácale benne' nazrí'i Le̱'! ¡Le güe lá'ana Xránadxu!