Sam keil 148:1-14

¹!Rehehati lat isen Iahova! !Kami koa miro en out nesa mihehati lat isen Iahova!

²Anatin, kami angelo keil, mihehati lati, kami koa mimul mivae en usite onen, mihehou lat isen.

³Meteiai ka avati, milhehati lati. Hitu keil, mihehou lat isen.

⁴Tounah keil koa mimul en teilang, mihesakin isen hehina nesa. Mahmah keil, mihetie lat hetetamenien onen.

⁵Kami vasi, mihehati lat isen Iahova, veni mumon kami vasi ral min ren.

⁶Anatin, navong kei meng kati, kami miva miro kat en out kati onami, ka misakras mivali hakot keil koa Ahi sani min kami.

⁷Kami vasi koa miro en out netan, ral min tounah vasi keil koa amoul en huinev ten atas, mihehati lat isen Iahova.

⁸Ahil koa vil ka voulul koa musel, ous koa mus ka eang koa muhuh keih, kami vasi koa mimul milong kat ren, mihehati lat isen Iahova.

⁹Hou keil ka vatihou keil, mihehati lat isen Ahi, hetal min vatiai keil koa amul en out teim ka koakeil emun amul en eivorohus.

¹⁰Buluk ka sipsip keil koa amah ka tirendan keil emun ten eivorohus, mihehou lat isen, hetal min tounah sav keil koa amul akekelau ka amuka.

¹¹Asuv houlu keil ka meatin savsav keil, mihehouhou min Ahi, hetal min avat keil ka hetetamen sav keil emun ten out netan.

¹²Meatin hau ka ahin hau keil, mihehati lat isen, hetal min ulmatu ka tovuli keil, ka titi ehon ka atouli keil emun.

¹³Tounah vasi keil mihehou lat isen Iahova veni isen enges marite mok mulin eis savsav vasi keil. Anatin, isen vi hetetamen imok en out netan ka en out nesa emun.

¹⁴Ahi mul san keihoen min meatin keil onen keke akilea avahati lat isen. Kei mul lei kat revi me-Isrel keil veni envatien onen mul en keil. !Sakini, rehehati lat isen Iahova!