SALMOS 148:1-14

¹¡Ma quipaquilismacaca TOTECO nochi tlen itztoque ipan elhuicactli! Quena, nochi tlen ajacatipa xijpaquilismacaca TOTECO.

²Nochi imojuanti inielhuicac ejcahua, xijpaquilismacaca TOTECO. Quena, xijpaquilismacaca nochi imojuanti tlen inquitequipanohuaj nepa elhuicac.

³Ma quipaquilismacaca tonati huan metztli. Ma quipaquilismacaca nochi nopa sitlalime tlen yejyectzi tlahuíaj.

⁴Ma quipaquilismacaca nopa elhuicactli tlen eltoc más huejcapa, huan nopa ayajtli tlen mopantía ajacatipa.

⁵Xijpaquilismacaca TOTECO pampa yajaya camatqui huan mochijqui tlen ama onca.

⁶Yajaya quinchijqui para eltose para nochipa, huan quichijqui se tlanahuatili tlen ica ax quema moyolcuepas.

⁷Ma quipaquilismacaca TOTECO nochi tlen itztoque ipan ni tlaltepactli. Ma quipaquilismacaca nopa huejhueyi tlapiyalime tlen itztoque tlatzintla hueyi atl.

⁸Ma quipaquilismacaca nopa tlitl, tesihuitl, setl, ayajtli, huan nopa ajacatl tlen quichihuaj ipaquilis.

⁹Ma quipaquilismacaca nochi tepetini, nochi tlachiquili, huan nochi cuatini tlen temacaj inintlajca huan nochi tiocuatini.

¹⁰Ma quipaquilismacaca TOTECO nochi tlamantli tlapiyalime, huan nochi tecuanime, cohuame, huan totome.

¹¹Ma quipaquilismacaca nochi tlanahuatiani tlen itztoque ipan tlaltepactli, huan nochi tlajtolsencahuani, huan nochi tlacame ipan nochi tlaltini.

¹²Ma quipaquilismacaca telpocame, ichpocame, huehuentzitzi, huan coneme.

¹³Ma quipaquilismacaca TOTECO pampa san yajaya quinamiqui tijhueyimatise. Ihueyitilis nelhueyi hasta quipano elhuicactli huan tlaltepactli.

¹⁴Yajaya quinfuerzajmacatoc itlacajhua. Ma quipaquilismacaca TOTECO nochi itlatzejtzeloltijca tlacajhua, nochi tojuanti tlen tiisraelitame tlen yajaya techiyocatlalijtoc para ma tiitztoca más inechca. ¡Xijpaquilismacaca TOTECO!