SALMOS 52:1-7

¹¡Xijtlacaquili ta catli timoilhuía para tlahuel tihueyi! ¿Para tlen timohueyimati ica catli fiero tiquinchihuili imasehualhua Toteco Dios? Toteco Dios quipixtoc itlaicnelilis para nochipa.

²Pero ta nochipa timonejnehuilía san catli fiero tiquinchihuilis sequinoc. Huan nochi istlacatili catli quisa mocamaco eli quen se cuchillo catli tlahuel tlatequi.

³Achi más mitzpactía tijchihuas tlen fiero huan amo catli cuali. Huan nojquiya achi más mitzpactía istlacatili huan amo catli melahuac.

⁴Mitzpactía titeistlacahuis. Huan mitzpactía tiquijtos camanali catli tecocohua. ¡Tiistlacatica tlacatl!

⁵Yeca Toteco Dios mitztzontlamiltis para nochipa. Mitzhuahuatatzas para mitzquixtis tlen mochaj, huan ayacmo tiitztos ipan ni tlaltipactli campa itztoque masehualme.

⁶Nochi masehualme catli quitlepanitaj Toteco, quiitase catli yaya quichihuilis nopa fiero masehuali, huan momajmatise. Huajca inijuanti quihuetzquilise huan quiijtose:

⁷“Xiquitaca catli ipantic ne masehuali catli amo quitlepanita Toteco Dios. San motemachi ipan itomi huan nochi tlamantli pajpatiyo catli yaya quipiya, huan quichijtinenqui catli amo cuali.”