Mboe 52:1-7

¹Mboe ki Dabit Indeeŋe ta Dabit imbot ki Ahimelek na, Doeg ta imar pa lele pakaana ki Edom na ila ma isotaara Saul pa Dabit. Kaimer Dabit itooro mboe tiŋgi. Nu tomtom mburomŋom, parei ta kalŋom izalla mi pakurkur itum pa mbulu ku sananŋana? Ambai, kamam lem! Mi Anutu mbulu kini ta itoto sua kini mbukŋana mi iurur leleene pa wal kini, ina irao imap na som.

²Nu tina mbel pakaamŋana, mi mburmbuuru pizin tomtom be pasaana zin. Mi kwom na, kembei yar mataanaŋana.

³Mbulu ambaiŋana mi sua ŋonoono na, nu lelem pa som. Mi mbulu sananŋana mi sua pakaamŋana na, nu lelem pa.

⁴Sua sananŋana boozomen tabe ipasaana zin tomtom i, ta nu lelem pa ilip. Mi sua pakaamŋana men ta iwedet pa kwom.

⁵Tana Anutu itunu ko ipasaana katu ma irao maŋga mini som. Ko ilema murim, mi namaana ila nomom, mi ipalkeetu pera mat. Mi itatke u pa wal matan yaryaaraŋan mazwan, mi ipiri u sula Andewa.

⁶Mbulu tabe Anutu ikam pu i, sombe wal ndeeŋeŋan tire, nako timoto. Mi kaimer to tisu mi tiseeŋge pu, mi tiso ta kembei:

⁷“Kere. To taiŋgi, ni leleene be ipase pa Anutu be iwe tuunu som. Pa ni le koroŋ boozo kat. Tanata ipase pa koroŋ kini tana be ikami ma imbot ambai. Mi ipasansaana zin tomtom, tanata indemeere sorok ma iso ko mburaana biibi.”