SALMOS 32:1-8

¹Nelía paqui nopa masehuali catli TOTECO quitlapojpolhuijtoc itlajtlacolhua huan quiixpolojtoc nochi itlaixpanolhua.

²Quipiya paquilistli catli ya quipohuilijtoc TOTECO itlajtlacolhua, huan ayacmo quitlajtlacoltía ica niyon se tlamantli. Ipan iyolo ayacmo mocajcayahua quen amo tleno quichijtoc.

³Quema ayamo nijpohuilijtoya TOTECO quen nitlajtlacolchijtoya, semilhuitl nitlaayijhuiyaya hasta nijmatqui para tlantoya nochicahualis.

⁴Techtlatzacuiltiyaya tonaya huan tlayohua. Techtlatzacuilti hasta nijmatiyaya nicuahuaquiyaya quen soquiatl huaqui quema chicahuac tlatotoniya.

⁵Pero teipa nimitzpohuili nochi notlajtlacolhua huan niyon se amo nijtlati. Nimotemacac nimitzpohuilis nochi notlaixpanolhua huan ta, TOTECO, nochi techtlapojpolhui, huan techquixtili nopa tlaeticayotl.

⁶Monequi para nochi catli moaxcahua mitztemose quema itztoque ipan tequipacholi. Monequi motemachise ipan ta, huan masque tequipacholi momiyaquilis quen se atlajtli catli chicahuac mixcuepa, amo quinajsis.

⁷TOTECO, ipan ta nimotemachía quema onca tequipacholi, huan ta techmocuitlahuía. Tijchijtoc para sequinoc ma nechyahualoca, huan inijuanti huicaj chicahuac para mitzhueyichihuase pampa techmanahuijtoc.

⁸TOTECO quiijtohua: “Na nimitztlalnamictis huan nimitznextilis nopa ojtli catli más cuali, catli monequi ipan timonejnemiltis. Na nimitzconsejomacas huan nimitztlachilijtos.