SALMOS 32:1-8

¹Nelía paqui nopa masehuali cati TOTECO quitapojpolhuijtoc itajtacolhua huan quiixpolojtoc nochi itaixpanolhua.

²Quipiya paquilisti cati ya quipohuilijtoc TOTECO itajtacolhua, huan ayecmo quitajtacoltía ica yon se tamanti. Ipan iyolo ayecmo mocajcayahua quej amo teno quichijtoc.

³Quema ayemo nijpohuilijtoya TOTECO quenicatza nitajtacolchijtoya, semilhuit niaxtiyaya hasta nijmatqui para tantoya nochicahualis.

⁴Techtatzacuiltiyaya tonaya huan tayohua. Techtatzacuiltij hasta nijmatiyaya nicuahuaquiyaya quej soquiat huaqui quema chicahuac tatotoniya.

⁵Pero teipa nimitzpohuili nochi notajtacolhua huan yon se amo nijtati. Nimotemacac nimitzpohuilis nochi notaixpanolhua huan ta, TOTECO, nochi techtapojpolhui, huan techquixtili nopa taeticayot.

⁶Monequi para nochi cati moaxcahua mitztemose quema itztoque ipan tequipacholi. Monequi motemachise ipan ta, huan masque tequipacholi momiyaquilis quej se atajti cati chicahuac mixcuepa, amo quinajsis.

⁷TOTECO, ipan ta nimotemachía quema onca tequipacholi, huan ta techmocuitahuía. Tijchijtoc para sequinoc ma nechyahualoca, huan inijuanti huicaj chicahuac para mitzhueyichihuase pampa techmanahuijtoc.

⁸TOTECO quiijtohua: “Na nimitztalnamictis huan nimitznextilis nopa ojti cati más cuali, cati monequi ipan timonejnemiltis. Na nimitzconsejomacas huan nimitztachilijtos.