1Mlingag gamu i falami lingag di Amuito Dwata; nlingagyu kenen i kdeeyu dad to di klamang banwe.
2Nlingagyu Amuito Dwata na dnayenyu kenen! Di kat duh tulenyu i fye tulen, kenen i gafalwà gito.
3Fgadèyu di kdee sahal banwe i kafye mgimoan; tulenyu di kdee bung dad to i dad gamtikeng nimoan.
4Du too mdatah Amuito Dwata, na too kenen gablà dnayen, kenen i too kanlikò mdatah fa di kdee dademe dwata gusmalig i dad to.
5I kdee dademe dwata fnaglut i dad to, dunan i dad ise glut dwata; bay Amuito Dwata, kenen i mimò kdee di langit.
6Kdatah na afè déén di kenen; i ktulusan na kafyen too teen di Bong Gumnean.
7Dnayenyu Amuito Dwata, i kdeeyu dad to di tah tanà; dnayenyu i kdatahan na i galan.
8Too mdatah Amuito Dwata, taman tooyu dnayen i kdatahan; nebeyu i bléyu di kenen, na fusuk gamu di gustifun dad to mangamfù di kenen.
9Di kfangamfùyu di Amuito Dwata, i landè salà, fdanàyu i ktoyu di kenen, kankal gamu di munan kdeeyu dad to di tah tanà.
10Manyu di kdee to di dad sahal banwe, “Amuito Dwata i harì! Tanimoan i banwe ani, na too mgagid i gufkahan dun, na laan mgingok. I kukuman i kdee to fagu di too glut kukum.”
11Flehew gamu kdeeyu mnè di langit na tanà, balù i dad mahin too gamu mluk, na kdeeyu mnè déén di lam mahin flehew gamu.
12Kdee tmabò di tanà na kdee kayu déén di dlag flehew mlingag,
13du salu dini Amuito Dwata, salu kenen dini du nukuman i kdee to di klamang banwe, na i kukuman i dad to fagu di katlu na fagu di kaglut.
