1I smulat ani dunan Itan, satu to Israh Amugu Dwata, lingaggu kel di landè sen i bong kakdom landè kgilin, na là tlag i ktulengu di dad to, na ge too gsalig.
2Gadègu i kakdom, landè kgilin kel di landè sen, na i kagsaligam, knean i knean landè kgumanan salngad i langit.
3Tagmanam, “Tanimògu i fakang di mgalékgu, i saliggu Dabid; na ani fakanggu di kenen, mangu,
4‘Làgu faloh ku tlag i kagotam; nun di belam nimògu harì kel di landè sen.’ ” Én i man Dwata di harì mgalékan.
5Amugu Dwata, dmayen kdee mnè ditù di langit i dad gamtikeng mgimoam; mlingag dad kasaliganam dmayen i kagsaligam.
6Amugu Dwata, simto kè di klamang langit salngad ge? Landè dademe ditù di langit salngad ge,
7du ge i too nafè dad kasaligan di bong kastifunla, na ge i toola kanlikò.
8Amugu Dwata, gumdatah i kdee di tah langit na tanà, landè gasngad i kbong ktulusam; na too ge gsalig di kdee nimoam.
9Balù dad malbang lwek di mahin, ge i magot dale; ku too mgal i lwek, ge sa i fafanak dun.
10Tafalmom Rahab, dunan i banwe Idyif, salngad di kafalmom satu lmanaf dmuen ge; na fagu di bong kgalam tasanbalétam i dad to dmuen ge.
11I langit, ge i mfun dun, na i tanà nfunam; ge mimò i klamang banwe, na kdee gkah déén, ge i mimò dun.
12Mdà di gufdu i nus timul kel di gufdu i nus sabnal, ge mimò i kdee; mdà di bulul Tabor kel di bulul Hérmon too dnayen i kafye mgimoam.
13Tay, too bong i gnaganam, na bong i kgalam; too mdatah i ktulusam.
14I katlu na kaglut i gugtadag i kagotam; i kdee nimoam fagu di kakdom landè kgilin na fagu di kagsaligam.
15Amugu Dwata, too nun kafye di dad to fulung dmayen ge, i dad to mnè di kakdom;
16tayud duh flehew ale di kafyem, na dnayenla i katlum.
17Magdayen gami mdà di ge, du ge gumdà i kgalmi na katumi, mdà di kakdom fdataham gami.
18Hae, Amugu Dwata, du ge i kamlung gami; na ge, Dwata Landè Salà, gusmalig i gutambulmi Israél, na ge i mlé harìmi.
19Gtalù ge di muna fa fagu di kanteen di dad tom too gsalig, na gmanam, “Tanalékgu satu to gumlégu gal di kasfati; tanalékgu kenen mdà di dad mdanà to du fanbalinggu kenen harì.
20Dunan Dabid, i saliggu, na fihokgu kenen fngalo ilè kenen i tanalékgu mbaling harì.
21Là tlag i ktabenggu kenen, na i kgalgu i tamgal kenen.
22I dad to dmuen kenen, làla kenen gfisan; i dad to sasè, là gamgatu kenen.
23Toogu falmo dad to dmuen kenen; dad to mnang nawa kenen, fnatigu.
24Làgu kenen tnagak, na mnè kenen di kakdogu landè kgilin; na matnù i kdatahan mdà di deg.
25Fabalgu i kagotan mdà di Mahin Méditéranyu kel ditù di bong yéél Yufratis.
26Na manan di deg, ‘Ge i Màgu na Dwatagu; ge i guflidunggu, na ge i Falwà deg.’
27Na nimògu kenen i sangal twege tingàgu, i too mdatah harì di tah tanà.
28Là mgili i kakdogu kenen kel di landè sen, na toogu dnohò i fakanggu di kenen.
29Nun di belan kadang nimògu harì kel di landè sen; fkelgu i kagotan di klo i langit.
30Kabay ku tnagak i belan dad flalògu, na làla lalò i gmangu,
31ku nlafàla i katedgu, na làla nimen i dekgu,
32fanlayamgu ale mdà di salàla, na fatdukgu ale mdà di sasè nimòla.
33Kabay knean là mgili i kakdogu ku Dabid, na là fakay ku làgu dnohò i fakanggu di kenen du mdà di kagsaliggu.
34Làgu nlafà i fakanggu, na làgu nawì balù satu di kdee tafakanggu di kenen.
35I fakanggu ani gafat kel di landè sen, du fakanggu fagu di katlugu, na too glut là agu tmulen kéng di ku Dabid.
36Too glut nun harì mdà di belan kel di landè sen, na fkelgu i kagotan di klo i duh.
37Salngad kagkah knè i bulen di langit, i knè kagotan kel di atuan; teen di bulen i kagkah knè i kagotan.” Én man Dwata.
38Kabay ani, Dwata, too sasè i kalbutam di to mgalékam harì; taknangam kenen na taknagolam.
39I kiboam saligam gambet landè fakangam di kenen; salngad ku tagbatam i kyangenan di kfung.
40Tafalbaam labat i syudadan, na tafalmom i dad guflidungan mdà di dad mngayu.
41Balù simto to magu mlius di banwen tmaku i dad knunan, na nadoy kenen i dademen saldan.
42Tafatum i dad to dmuen kenen, na taflehewam ale.
43Talaam nimò gban i dad tekan, du laam kenen tnabeng di kasfati.
44I bong kdatahan na kafyen tanweam di kenen; na tanweam i glalan.
45Mdà di dad kiboam kenen, tafanbalingam kenen too tua, balù ise fa bangan tua; na toom kenen fyà.
46E Amugu Dwata, tan i klo tatiam fbayà i harì mgalékam? Kel di landè sen? Na kel di kilen fa i too kinit i kalbutam kenen?
47Amugu Dwata, fandamam i kfukal klawil i dad to. Landè dé gukmamum dad to, du tanimoam ale, bay kdeela mlal mati na landè alì fye gaganla?
48Simto to mto na landè kfatin? Landè to gmadè i kiboan fye laan mati.
49E Amugu, tanè i kakdom landè kgilin tafitem di muna, i kakdom tafakangam di ku Dabid fagu di katlum?
50Fandamam i saligam ani, ku tan i kadoyla deg, na i ktayudgu i kafsasè i dad to mdà di dad sahal banwe.
51Amugu Dwata, i harì mgalékam toola tnamfayes; nadoyla kenen balù nè gusalun.
52Kabay balù ani i gmangu, knean toogu dnayen Amugu Dwata kel di landè sen! Amén.
