1Ani satu lingag Dabid. Dwata, kanlungam agu du ge i guflidunggu.
2Mangu di Amugu Dwata, “Ge i gumdatahgu; landè fye gfungu ku ise mdà di ge.”
3I dad to Dwata mnè di tah tanà ani, too ale fye; na too nun klehewgu samnagin dale.
4I dad to ftabeng di dad ise glut dwata, matnù baling i kaflayamla. Là agu makuf di dad kadsùla, na balù dagit i dad dwatala làgu tlo du ftabeng agu.
5Amugu Dwata, alò ge i amu tanalékgu, na ge i gumdà kdee kanlidùgu; i ktogu déén di falelam.
6I alel gablém deg too fye di deg. Tay, kafye i gdawatgu mdà di ge.
7Dnayengu i Amugu Dwata du kenen i mngewe deg; na ku butang balù di lam i nawagu nun tamdò deg.
8Làgu tlag fdatah i Amugu Dwata di fandamgu, na du déén kenen di safédgu là agu galwà di ifatan.
9Taman too mlaan i nawagu, Amu, na too agu lehew; na balù i lawehgu saliggu di ifatam,
10du balù mnè agu di agot i fati laam agu bayà; laam tnagak i to toom kando di lbang.
11Ge i tamdò deg i dalan mfun falami nawa; i kafdadongam, én gumdà ksikof i klehewgu, na i dad tabengam gumdà i kafye landè gusenan.
