Sabóor 59:2-13

²Éy sama Yàlla, xettli maak noon yi, làq ma ñi ma jógal.

³Xettlimaak ñiiy def lu bon, wallu maak bóomkat yi.

⁴Aji Sax ji, ñu ngii di ma tëru, nar maa rey, di ma songe seen doole, te tooñuma, moyuma.

⁵Defuma lu ñaaw, ñuy xélu, di ma waajal; ngalla, jógal taxawusi ma, ba gis.

⁶Aji Sax ji, Yàllay Israyil, Yàlla Boroom gàngoor yi, yewwul, dikkeel xeeti yéefar yépp, mbugal! Workat yu bon yi, bu leen yërëm! Selaw.

⁷Bu ngoonee ñu wàccsi, di xiiru niy xaj, di wër dëkk bi.

⁸Déglul li ñuy yebbee ci seen gémmiñ, seen làmmiñ niy saamar, ñu defe ne kenn déggu leen.

⁹Te yaw Aji Sax ji, yaa ngi leen di ree, yaa ngi kekku yéefar yii yépp.

¹⁰Yaay sama doole, ma di la séentu, yaw Yàlla, yaay sama rawtu.

¹¹Sama Yàlla ju goree may gatandu. Moo may may ndam ci noon yi, ma gis.

¹²Yàlla, bu leen rey, lu ko moy samaw xeet fàtte. Tasaaree leen sa doole, daane leen. Boroom bi, yaa nuy feg.

¹³Bàkkaar lañuy wax, seeni kàddu, bàkkaari neen. Yal nañu bew ba daanu, yooloo ko seeni saagaak seeni fen.