GWAY GI IDAWUU’D 59:2-13

²’Cuḵi aha/ mo ’peni uni gwansan kun mii tonthus mo, dhali tayi aha/ is ki me’d mo ’peni ’kwani gwansan kun ’kosha ṯe/ mmowol ’kwaniya bas mo.

³Haali/, hili mo mo ma, uni ishkin mmoc̱or mondiki/em pem mo, ’kwani kun ’cithira/ ’cithir mo tani uni ’tuntulki is buni imonṯal ’de/ ap̱o/ aha/ mo. Gom gwon dhaŋ pem walla miinthus pem yisa, ayy Tap̱a,

⁴walla gom miim pem jin thamka/ yisa, uni urkina uri sho’k mo dhali thoson is mo. Muri is pini mo, dhali p̱u’du/ mo dhali woṯẖ aha/ mo, dhali p̱ari mii yan e mo.

⁵/E, jin ta Tap̱a Arumgimis gi momis mo tani, /e tana Arumgimis ma Israyiil mo be. Meri is mo dhali c̱iya ris kal gi ’kwaniny’cesh to kun wana e ki miim buni mo. Dhalku/ ki dhal jan ṯal ’deŋ kamu/ bway mo ’peni uni gwansan kun ’dap̱a e ki mii ma wu’th gi tonthus mo. Doshi ma dhali ’cunycuri yan mo.

⁶Mom’pimpili/ isa yempa/ mo tani uni p̱u’dkin ka nyaŋ’ko’d mo mmobuḵ me’da ’ka ka ris mo dhali ’thil is buni e ’peŋkuman bampa/ mo.

⁷Uni anann be, gwona bomboḵ ki ’twam buni mo, dhali ḵaa ’twa/ i is ki ’twam buni mo – haali/ kaja ikuluma uni gwo ibwa mo mmo/o gwo mo ki: Kaja imidi ciḵ ana mo?

⁸Hili /e, ayy Tap̱a, /e p̱e’thki uni mo, dhali /e dhukina ris kal gi ’kwaniny’cesh mmota uni gun waḵu mo.

⁹Ayy Mom’bi’th pem mo tani aha/ mina yuḵ gway mo mmomaŋ /e mo, haali/ /e, ayy Arumgimis, tana cur pem jin ṯenu gwo mo.

¹⁰Arumgimis pem jin di’d e mo/en piti jin ṯelu sho’k mo tani a’di midi gam aha/ ’kup̱ mo. Dhali Arumgimis pem a’di midi dhal aha/ bway mo mmop̱ar mo jin p̱inu mii e mo ap̱o/ uni gun ta ’kup̱ ki aha/ mo.

¹¹Dhalku/ uni ki ’kosh jwa mo, isi ciki/ tagi ’kwanim pem mini this uni e mo. Dhuyi uni mmomol dosh shoka ’cesh mo ki mom’bi’th pini mo, dhali ’doku/ uni ka luŋgu’b mo, ayy Tap̱a, jin ta jim bam jin ta’da goŋgoro/ mo.

¹²Haali/ gom miinthus kun miikina uni ki ’twam buni mo, dhali ki gwo ma le’d buni mo, dhalki uni bu’th ma kume/ gi ’bam buni kun dhuna uni ki ca mo. Gom gwo ma jee dhali gwo ma ṯor kun baha uni mo tani

¹³shwayi uni ki ’ci’d’da/ ka nyor pini mo, shwayi uni ki ’ci’d’da/ ntagi uni mini ’koki ’ko doḵ/e mo, ki ’kwani mini mish ki /e tana Arumgimis jin ji ’kwani ma Yakuub mo ntagi ’pemen gi mony’cesh mo be. Doshi ma dhali ’cunycuri yan mo.