Sabóor 45:1-13

¹Mu jëm ci njiital jàngkat yi, dëppook galan bu ñuy wax Tóor-tóor, ñeel askanu Kore wu góor, dib taalif, te di woyu mbëggeel.

²Woy wu neex a fees sama xol, may taalifal Buur, sama làmmiñ ni xalimag bindkatu ndaanaan.

³Yaa gëna góorayiwe ci àddina, sa kàddu diw yiw, ndax Yàllaa la barkeel ba fàww!

⁴Jàmbaaroo, takkal sa saamar, te yànj, am daraja;

⁵ànd ak daraja, dawal ba am ndam, di dawal dëgg ak yërmande ji war, ba mana def ay jaloore.

⁶Yaw Buur, say fitt a ñaw, di jam say noon ci xol, ay xeet daanu, nga tiim.

⁷Yaw Yàlla, sab jal a sax dàkk ba fàww. Njub nga ŋanke sa nguur gi,

⁸di sopp dëgg, bañ lu bon, ba Yàlla, sa Boroom diwe la diwu mbég, nga tiim say moroom:

⁹sa yére yépp di gilli ndàbb, alowes akum kanel, ñu di la bégale xalam, ca sa biir kër yu yànj.

¹⁰Ay doomi buur a ngi ci jigéen ñi nga teral, sab lingeer féete la ndijoor, takkoo ngëneelu wurus.

¹¹Janq doom, gisal, déglul te teewlu ma, fàtteel say bokk, fàtte sa kër baay,

¹²Buur xemmeme la sab taar; mooy sab sang, wormaal ko.

¹³Waa Tir a lay yótsiy may, ay boroom alal di wut lu la neex.