1Yeyi, mooroot Naomi-kang, baal kol Boaz. Baal mooroot koort-maatang Naomi-yang, warda-kadak ngoongoolong Elimelech-ang.
2Ruth Moab-ang waangki Naomi, “Koorl-oola nganyany boodjerak kwolakang kidji wedjang kwolaka. Ngany kayar-koorl ngoolyar moorta ngiyan bedik-bedik nganyak”. Naomi waangki baalany, “Woort-koorl, ngany koowart”. Ngarl Ruth koorl boodjerak kwolakang kidji wedjang kwolaka ngolonga yakina kwolakang. Yeyi, Boaz kadak nidja boodjera kwolakang. Baal mooroot Elimelech-ang. Winidjinbar Boaz yoowal-koorl Bethlehem-yen. Baal waangki yakina kwolakang, “Boolanga-Yira nyin noonookayel!” Baalap yarman-waangki, “Boolanga-Yira yanga-kwabba noonany!” Karro Boaz waangki-djinang birdiyar yakinang kwolakang, “Nidja yok, ngiyan baalang mooroota?”
6Birdiyar yakinang kwolakang yarman-waangki. “Nidja baal Moabang kidji korl-koorl Naomi-yel Moab-yen. Nidja yok waangki, ‘Wedjang-oola nganyany kwolaka ngolonga yakina kwolakang’, kidji baal kwadja-yaka nidjap ngaangk yirakang kidji yoowart nganop.” Karro Boaz waangki Ruth, “Ni, ngany koowart, yoowart koorl warmma boodjera kwolakang, yoowart wort-kool yalga djin-bordak ngany yoka mordiyaMiyalitj boodjera kwolakang kidji djin-bordak yakina kwolakang. Ngany kwadja waangki mamarapa mordiya yoowart yigan noonany. Bayinya noonook djarnyak kepa djoro, barrang kepa nganyang mamarapa mordiya kwadja barrang.”
10Yeyi Ruth djabalar moolymarriyal, kidji waangki baal, “Natj kwabba ngany kwadja-don, ngarl noonook djinang nganyany kidji ngorna-kwabba nganyak? Ngany mokang.” Yalga Boaz yalman-waangki, “Boola moorta kwadja-waangki nganyany moodlooka noonook kwadja-don noonang mangatang ngolanga noonang koort-maat wanni. Noonook wandja noonang maaman wer ngaangk wer noonang boodjera koortang, kidji yoowal-koorl nidjap, moortak noonook yoowart katitj. Etjenna-bal Boolanga-Yira yanga-kwabba noonany. Etjenna-bal Boolanga-Yira Israel-ang yanga noonany moodlooka kwabba narla noonook kwadja- yoowal-koorl ballaridjo baalang ganbar-ngarda.” Kidji Ruth waangki, “Nganyang birdiyar, etjenna-bal ngany kalyakool nyin kwabba noonang miyalakal. Ngany yoowart nganyang yakina, ngany yoowart mokiny nganyang yoka mordiya, yalga noonook kwadja-kwabba-don nganyak kidji waangki bedik-bedi noonak.”
14Nginda moorta ngarniny, Boaz waangki Ruth, “Yoowal-koorl nidjap, kidji ngarn kidji ngarda-barrang noonang mwereny bwora kepa djadam.” Ngarl Ruth nyin bordak yakina kwolakang kidji Boaz maar-barrang baalany mwereny yakina kwadja-dookarn. Baal ngarn moorditj, koboorl moorart, kidji bangka mwereny wandja.
15Nginda Ruth yiraba wedjango ngatti kwolaka, Boaz waangki baalang mamarapa mordiya, “Noonooka wedjang-oola baalany kwolaka kardagor boonaraka kwolakang. Yoowart karnyiny baalany. Noonooka djarnyak djookorn ngatti kwolaka baalang kidji ngardakwir kwolaka baalang kidji yoowart djaat baalany.” Ngarl Ruth wedjang kwolaka boodjeral kwolakang kwadjat kedalak, kidji baal bama kwolaka baal kwadja-wedjang kidji baal barrang moorart kooda kwolakang.
18Ruth barrang kwolaka baalang mya-myak kidji Naomi djinang natj baal kwadja wedjang. Karro Ruth yanga baalang mangat mwereni baal yoowart kwadja-ngarn baalaal. Baalang mangat waangki-djinang baal, “Windja noonook wedjang kwolaka? Windja noonook yaka nidja kedala? Etjenna-bal Boolanga -Yira yanga-kwabba mamarap ngiyan djinang noonany.” Ngarl Ruth warranga baalang mangat moodlooka mamarapang wer baalang boodjera kwolakang. Ruth waangki. “Nitja mamarap kol Boaz!” Naomi waangki baalang koowart, “Etjenna-bal Boolanga-Yira yanga-kwabba nidja mamarap. Baal yoowart nganop ngorna-kwabba moortak wininy wer noyitj.” Naomi kardjir waangki Ruth, “Nidja mamarap ngalang relative, ngalang moorditj-moyiran.”
21Kidji Ruth Moabang waangki, “Baal kardjir warranga nganyany, ‘Boordak-djin nganyang yakinak kwadjat baalap nganop wedjanginy bandang nganyang kwolaka’.” Naomi waangki Ruth, baalang nopang koort-maat, “Nidja kwabba-ngatti, nganyang koowart. Noonook djarnyak boordak-yaka baalang yoka mordiyak narla moorta bakkan-pa noonany warmma boodjera kwolakang.” Ngarl Ruth boordak-djin Boaz-ang yoka mordiyak kwadjat baalap nganop wedjang kwolaka. She nyin karla-mayal baalang mangatang.
