Rut 2

1

2

3

4

¹Ma Naominê akweŋnê lasitêwa teŋ gêmoa. Eŋ ŋac tolêlôm aŋga Elimeleknê gôlôacnêŋ. Ênê ŋaê Boas.

²Ma Moabo Rut kêsôm gêdêŋ Naomi gebe “Ôlôc ma jana kôm najajoŋ polom ŋasaliŋ-saliŋ sa jandaŋguc lau, taŋ sêlic aê ŋajam ma têtiŋ aê atom naŋ.” Ma Naomi kêsôm gêdêŋ eŋ gebe “Latucoenec, ônamaŋ.”

³Tec gêdi jakejoŋ polom ŋasaliŋ-saliŋ aŋga kôm teŋ kêdaguc lau-sêsapwaga. Ma kôm tau tonaŋ Boasnê. Eŋ Elimeleknê gôlôacnêŋ ŋac teŋ.

⁴Gêdêŋ tonaŋgeŋ Boas mêŋgêô lasê kôm. Eŋ awa gêjac lau-sêsapwaga gebe “Apômtau êwiŋ amac.” Ma êsêac sêjô eŋ awa gebe “Apômtau ênam mec aôm.”

⁵Go Boas kêsôm gêdêŋ nê sakiŋwaga, taŋ gejob lau-sêsapwaga naŋ, gebe “Asanê ŋapalêo tônê.”

⁶Ma sakiŋwaga, taŋ gejob lau-sêsapwaga naŋ, gêjô eŋ awa gebe “Eŋ Moab ŋapalêo, taŋ gêwiŋ Naomi aŋga gamêŋ Moabŋa gêmêŋ naŋ.

⁷Awê tau kêsôm gebe ‘Aê jateŋ gebe alôc gebe jajoŋ polom ŋasaliŋ-saliŋ jamoa lagic ŋasawa jandaŋguc lau-sêsapwaga.’ Amboac tonaŋ tec gêmêŋ ma gêjam kôm ŋapaŋ gêdêŋ bêbêc kanucgeŋ e mêŋgêdêŋ galoc ma kêlêwaŋ tau ŋagec atom.”

⁸Go Boas kêsôm gêdêŋ Rut gebe “Latucoenec, ôkêŋ taŋam aê acgom. Ojoŋ polom aŋga kôm teŋ ma ôwi tonec siŋ atom. Ôwiŋ aêŋoc sakiŋwagao baŋbaŋgeŋ.

⁹Ma matam êsap kôm, taŋ êsêac sêsap sêmoa naŋ, ma ôndaŋguc êsêacgeŋ. Aê gajac biŋsu sakiŋwaga gebe sêlênsôŋ aôm atom. Bu embe êjô aôm, go ôndêŋ ku naônôm bu, taŋ sakiŋwaga têtê naŋ.”

¹⁰Go Rut gêu tau laŋôanô jagêdêŋ nom ma kêsôm gêdêŋ Boas gebe Aê awê jabao nec gajac matamanô ŋajam ma matam gêdiŋ aêgeŋ kêtu asageŋŋa.”

¹¹Boas gêjô eŋ awa gebe “Gêŋ samob, taŋ aôm gôgôm gêdêŋ lawamo laŋgwa gêdêŋ taŋ nêm akweŋ gêmac êndu e mêŋgêdêŋ galoc naŋ, sêjac miŋ gêdêŋ aê tomalageŋ. Aôm gôwi tênam agêc tamam to nêm malacmôkê siŋ mêŋgô lasê gamêŋ teŋ, taŋ gêmuŋgeŋ gôjam kauc naŋ.

¹²Apômtau êmoasiŋ aôm êjô gêŋ, taŋ gôgôm naŋ, ma Apômtau Israelnêŋ Anôtô, taŋ gôê lamu ênê magê gômôêŋ tonec naŋ, êkêŋ moasiŋ totau-totau êndêŋ aôm êjô.

¹³Go awê tau kêsôm gebe “O ŋoc apômtau, aôm kômoasiŋ aê ŋanô to gôjac aê têtac tôŋ. Aômnêm sakiŋwagao ŋanô teŋ aê atom, mago kôsôm biŋ ŋajamgeŋ gêdêŋ nêm sakiŋwagao aê.”

¹⁴Gêdêŋ noc sêniŋ gêŋŋa Boas kêsôm gêdêŋ awê tau gebe “Ômôêŋ mêŋôniŋ polom ma ôsac nêm polom ŋagêdô tôŋ êsêp wain.” Amboac tonaŋ Rut gêŋgôŋ gêwiŋ lau-sêsapwaga ma Boas kêkêŋ polom sigob gêdêŋ eŋ geŋ. Ma awê tau geŋ e gêôc eŋ tôŋ ma ŋagêdô gacgeŋ kêkô.

¹⁵Gêdêŋ taŋ awê tau gêdi gebe ejoŋ polom ŋasaliŋ-saliŋ naŋ, Boas gêlêŋ biŋ nê sakiŋwaga gebe Andec eŋ ejoŋ polom êmoa lagic ŋasawa ma anac jao êndêŋ eŋ atom.

¹⁶Ma ataiŋ ŋakaiŋ ŋagêdô su aŋga lagic ma awi siŋ ênêc, gebe eŋ ejoŋ sa ma aec biŋ eŋ atom.”

¹⁷Amboac tonaŋ tec kejoŋ gêmoa e kêtula, go kêsêlô polom, taŋ kejoŋ sa naŋ, e ŋadôŋ amboac talu tageŋ.

¹⁸Ma eŋ kêkôc ŋanô tau sa gêja malac jakêtôc gêŋ, taŋ kejoŋ sa naŋ, gêdêŋ lawao laŋgwa ma kêkôc gêŋ, taŋ geŋ e gêôc eŋ tôŋ naŋ, ŋagêdô jakêkêŋ gêdêŋ eŋ.

¹⁹Ma lawao laŋgwa kêsôm gêdêŋ eŋ gebe “Ocsalô tonec aôm kojoŋ polom ŋasaliŋ-saliŋ sa aŋga ondoc ma gôjam kôm gômoa ondoc. Anôtô ênam mec ŋac, taŋ mata gêdiŋ aôm naŋ.” Tec Rut gêjac ŋac, taŋ gêjam ênê kôm naŋ, nê miŋ gêdêŋ lawao laŋgwa ma kêsôm gebe “Ŋac taŋ gajam kôm gawiŋ eŋ gêdêŋ ocsalô tonec naŋ, nê ŋaê Boas.”

²⁰Go Naomi kêsôm gêdêŋ lawao gebe “Apômtau taŋ kêgamiŋ nê moasiŋ gêdêŋ lau mateŋ jali to ŋacmatê atom naŋ, anam mec eŋ.” Naomi kêsôm biŋ tonec gêdêŋ eŋ gêwiŋ gebe “Ŋac tau aêagêcnêŋ lasitêwainêŋ teŋ eŋ kêtu aêacnêŋ nomlênsêm ŋakêsiwaga teŋ gêwiŋ.”

²¹Ma Moabo Rut kêsôm gebe “Eŋ kêsôm biŋ teŋ gêdêŋ aê gêwiŋ gebe ‘Ôsap ŋoc sakiŋwagao tôŋ ŋapaŋ e sênac ŋoc kôm ŋanô samob sa êmbacnê.’”

²²Ma Naomi kêsôm gêdêŋ lawao Rut gebe “O latucoenec, ŋajam gebe ôsêlêŋ ôwiŋ ênê sakiŋwagao, gebe teŋ êlênsôŋ aôm aŋga kôm ŋagêdô atom.” Amboac tonaŋ Rut kejoŋ polom ŋasaliŋsaliŋ sa kêsap Boasnê sakiŋwagao tôŋ ŋapaŋ e sêjac polom to polom sa gêbacnê. Ma eŋ gêŋgôŋ gêwiŋ lawao laŋgwa. lasitêwainêŋ nomlênsêm, gebe lau jaba sêjaŋgo su atom.