1Yáaweefa Mooseena qímaminoo qinau.
2Anee Isaraee máqannaasa qímanniminaqa misa óonurandee quándaki Piqaqiroota máqusa óorinni Mikadoora máqusa dínni taatuqee óoruku nammari dínni miná qámbaana Baa Seefoona máqusa aaqa úiqaana máqauqa usakáaqa.
3Fáraoofa maaqí qímasee íriannoo, Isaraee máqannaasa aadána máqa máaqaki fíranara rufíqaidaqa maqa máaqaki óonuree anirée idámmiaafoo qíannoo.
4Qinée Yáaweesa kaukaata qira írirana Fáraoona ámiananóo mifa ínni nínaaqiana nífaqee fúànnoo. Qinée Fáraoona fáqa miná rákira fásiqauqa faqa úrinnaaqararanannái fíraa dúqu máraanaura. Miqímmásaanaqa Isipa máqannaasa qiní Yáaweesara írifáranoo. Miqí qímasoofaqa Isaraee máqannaasa Yáaweena ufa máu fíqa anirandée fiqau.
5Isipa máqannaa karaambáiqa Fáraoofa narí aináiniranasaa rakísirausa fáqa Isaraee máqannaa quqásee funára kaifáa óonu máfi írufanoo sía andeeqóofanoo qinau. Maasá nána fúrufaree qímarunaqee Isaraee máqannaasa idukúaki quqásee fídaqee. Maasá Isaraee máqannaasa quqásaafaqá fuafanóo yáfee maasá aináinira fáiqi kíannoo fee.
6Miqí qímasoofanóo Faraoofa narí qóosa rarisée máru rakira karána faqa narí rákira fásiqauqa fáqa deedaqinau.
7Fáraoofa qóosa rarisée maru rakira karáusa ámiqiranauqa kai sikis handaréeta 600 fáqa Isipa máqa máaqaki máru qoosa karáusa faqa minásaa rakísi márusa faqa mara quqásoofaqa Isaraee máqannaasa nífaqee fiqau.
8Yáaweefa kaukaataqíra írirana Fáraoona Isipa máqannaa úriqararana ámufanoo Isaraee máqannaasa idukúakiqa fídaqa nàsuriqá fímarufanoo Fáraoofa nífaqee finau.
9Isipa máqannaa súdiauqa náriqa qóosauqa faqa nári qóosa rarisée maru karáusa faqa daraiwáauqa faqa Isaraee máqannaasa nífaqeeqa Taatuqée óoruku námmari aaqá Piqaqiroota maqúsa dinni Baaraseefoona máqusa dínni qámbaana úiqaana máqa usakásee márufaqa óonu paqúriqau.
10Óonuroofaqá Isaraee máqannaasa Fáraoona faqá miná rákira fásiqauqa faqa níqafamáseeqa tautúmáseeqa rufíaidaqa Yáaweefa dadaaqíaníféera fáaqariqau.
11Fáaqaridaqa Mooseena qímamiqa qiqau. Isipa máqasaa madika sía amanaikífanee anée maasá qífiqeenanee maa aadana maqa maaqánaki kúquaneera áninanee. Anée maasá Isipa máqa máaqakinaana qífiqee ánianafa quandáfina qáfaa.
12Óoqai maasá aní ufa qímamiqiafana maasá Isipa máqa máaqaki káqi máridaqa maa ainaináfa kambíqaannoo fee qiqíafana. Maasá ani qímamiqiafana sáina maasá káqi Isipa máqannaasa aináinira fáiqi kíqa márianee qiqíafana. Miqóo máridaqa misá aináinira fáiqikirafa ámiqirafa máriqini anée maa aadana maqa maaqánai fífau qífiqee mínisàanáqa kúquanaura.
13Mooseefa misá ufa iriséenoo qímanniminoo qinau. Ínnee sía rufíaaqa, káqi nímatautásee máridaqa Yáaweefa ínnee asumu máriaqeera ititá nímaqáinaqa qáfeefaranoo. Maqeé ínnee Isipa máqannaa ámiqimasee níndafaaqa. Ínnee maaqóoqari sía kafáa níndafeefaranoo.
14Yáaweefa ínni rákirana nímaaqa maqa fínoo misá sáimbaqa rákuannoo. Miqínaqa ínnee sía moó áinaina áuqaaqa, káqi kaí máriaqa.
15Miqi qímasoofanóo Yáaweefa Mooseena qímaminau. Anée nánaree qiníara dadaaqíànnee qímasee fáaqaridanee. Anee Isaraee máqannaasa qímanniminaqa nóori mundúqáannai fuaqa.
16Anee aneenná sáunù nammári ámummaqa uqéeráa. Miqímma sáinaqa nammári rainá fínaqa Isaraee máqannaaa amaná aadána máqasaa táqaaqa.
17Qinee Yáaweesa Isipa máqannaasara qíanaqa káaqa firaaqóo kaukaataqíra írirana marasée Isaraee máqanna nínaaqíànna nífaqee fifáranoo. Qinée Fáraoona faqa miná sundíauqa faqa miná qóosa rarisée mári karáusa faqa daraiwaauqa faqa rákirana úrinnaaqararanannai firaa duqu máraanaura.
18Qinée misá úrinnaaqaramá sáanaqa misá qiníara Yáawee fee qifáranoo.
19Ánutuna qangiroo fannóo Isaraee máqannaasa nóorinni máriufa áiqareenoo nínaaqíannai finau. Oonnámu faqa miqí kai ínoo áiqaree nínaaqíànnai finau.
20Mi oonnamúfa Isipa máqannaasa dínni Isaraee máqannaasa dínni qámbaana márinau. Mi oonamúfa Isipa máqannaasa asukuna nimisée Isaraee máqannaa káaqa qámannimaqánau. Miqínoo márufaqa mi eendánaki Isipa máqannaasa faqa Isaraee máqannaasa faqa sía narí aaqá narí aaqá fiqau.
21Mooseefa ásauku nammári amummaqa uqéerasoofanoo Yáaweefa súani áfu úrimarúnnaindaraa afeeka ufainnóo ooruku námmari rainánau. Mi ufaifá mi eendánaki úqidanoo máriufanóo ooruku námmari rainásoofanoo aadána máqa koorooinau. Miqímmáfufanoo nammári rainánau.
22Miqímmafufaqa Isaraee máqannaasa ooruku námmari qámbaana aadána máqasaa táqaqau. Dínni dínni nammári fannoo safásara foorá inóo márufaqa fiqau.
23Isipa máqannaasa misá níqafamaseeqa misá nínaaqianna nífaqeeqa nammári qámbaanai óoquraqau. Isipa máqannaasa náriqa qóosauqa faqa náriqa qóosa rarisée maru karáusa faqa náriqa daraiwáauqa faqa Isaraee máaqanaasa nífaqee námmariki óoqu raqau.
24Iáqaróoka Yáaweefa oonnámukiqari fáqa idáurukíqari fáqa Isipa máqannaasa níndafamáseenoo mapáraa írana niminau.
25Yáaweefa qufanóo qóosa rarisée maru karáusa misá níku utúsamafufaqa fírara firaaqóo anuqí máriqau. Miqúfaqa Isipa máqannaasa qiqau. Yáaweefa Isaraee máqannaasa sáaroo qínoo maasá dáridanoo. Máraifaqa quqásee fúà.
26Miqímasoofanoo Yáaweefa Mooseena qímaminau. Aneenná ásauku nammári amummaqa uqéerasainanoo kafáa nammári fánnoo qúminoo Isipa máqannaa nári qóosa rarisee maru karáusa faqa daraiwaauqa faqa rafáaqa fuani.
27Mooseefa iriséenoo ásauku nammári amummaqa uqéeranau. Miqímmá soofanóo iáqarooka nammári fánnoo kafáa óonurandeenoo óoqai máriundée kai máfinau. Isipa máqannaa sandéeqa fuanéera qufanoo Yáaweefa misá maréeqee nammáriki áqinau.
28Nammári fánnoo kafáa qúminoo Fáraoona rákira fásiqauqa fáqa qóosa kára fáqa daraiwáauqa fáqa aiqáma Isaraee máqannaasa nífaqee námmariki óoqúroosa aiqáma rafáaqa finau. Sía uqanna moodáafa káqi márinau.
29Isaraee máqannaa ooruku námmari qámbaana aadána máqasaa táqaqau. Nammári dínni dínni safásara foorá inóo márufaqa fiqau.
30Mi fáasaanná Yáaweefa Isaraee máqannaasa Isipa máqannaasa nísaukukinaana máranau. Marasoofaqá Isaraee máqannaasa quandáfi níqafoofaqa Isipa máqannaa nammári áfaiqara kúqiqeeqee máriqau.
31Isaraee máqannaasa Yáaweena moó áinaina afeeka eeraarirana rákiranaki Isipa máqannaasa úrinnaaqaróonara írufanoo náaquqoofaqa nárì saqárikirana Yáaweenasaa fáqa miná aináinira fáiqi Mooseenasáa fáqa mundíqau.
