Rafúdoo 24

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Ánutufa aiqáma úfauqa Mooseena qímamiseenoo kafáa maaqí qinau. Moosee anée faqa Áaroona faqa Nadabana faqa Abiquna faqa Isaraee máqannaa rakísirausa 70 úriqararausa faqa nífiqa maree ururéeqa níanasaa kummáramáfinaqa qiníara innaaru qídaqa qimooqiaqa.

²Moosee anée kai adeedí ánia. Sía akaqá rakísirausa qiní daaqa ániaqa.Faiqí ánaasee faqa sía uqanna áaqanai úruaqa.

³Mooseefa óoqureenoo faiqí ánaasee Yáaweena sándufa aiqáma qímannimisoofaqá misá maaqí qímasee moodáa kari nóo raqámaree qiqau. Yáaweefa qindée íqa maasá aiqáma áinaina áuqaanaura.

⁴Miqí qímasoofanoo Mooseefa Yáaweena sándaufa aiqáma ákara rinau. Ákara rúmaseenoo kanánaana iáqoofanoo áaqana áikunni aandáu tutúfira qáinda áuqinau. Áuquseenoo óoni qísaukuqara taikásee qíkunni óoqu qaara marasée 12 óoni maraséenoo qaindá fíqu fíqumma Isaraeena faiqi námu nimana kái rakíqánau.

⁵Rakíqaseenoo kumaaráauqa qímannimufaqa burimakáù arusée munu Ánutuna tatúfirana suqáqau. Mi tatufira aandaúna Isaraee máqannaasa faqa Ánutuna faqa moodáanaki suqíra tatufiraneé qiqau.

⁶Misá arusoofanóo Mooseefa burimakáù fidíka akaqána difáaníkiaqa sakaséenoo káqi máruna qumárenoo aidaraí rurúfinau.

⁷Rurúfa máseenoo Ákíiseenoo Mooseefa Ánutufa moodáanaki kíra ufa qímaqoo bukana ákara rúmáqoona máree fíndifinoo aiqáma minakínaa úfa ásaana rúmasee firaaqóo faiqí ánaasee qímanniminau. Misá iriséeqa qiqau. Maasá Yáaweena mi sandaufána aiqáma irisée áfaqáanaura.

⁸Mooseefa misá úfa iriséenoo difáanikinaa fidika káqi máruna indakú faiqí ánaasee kíaqa áqidanoo qinau. Ánutufa maa sanda ufáusa nímuqooqari maa fidikáfa Ánutufa ínni faqa moodáanakí kuná afeekaikámmá nímaqaidanoo.

⁹Miqí qímaseenoo Mooseefa Áaroona faqa Nadabana faqa Abiqufana faqa Isaraee máqanaa úriqararausa 70 faqa nífiqeenoo áaqanasaa óorufinau.

¹⁰Óorureeqa miqóo misá Isaraee máqannaa Ánutuna qáfaqau. Miná áiku ámeemaanai innaarúna kudimandára foorá íra óoniuqa miná auqu safiree fée qimaru oonísa ausirírafáuqa márinau.

¹¹Misa Ánutuna qáfoofanoo sía misá nárinau. Misá miqóo moodáanaki suqúfu faqá nárana nammári naqau.

¹²Misá námasoofanoo Ánutufa Mooseena qímaminau. Anée áaqanai qinée márunnannai úrua. Ururáinaqa qinée qeeqá sándufa anée faiqí ánaasee naakápáanneera qaara oonisáa ákara rúma ámíànaura.

¹³Mooseefa miná iriséenoo narí dadaaqímaruna Yoosuaana faqa deedaqammá séeqa Mooseefa áaqanai Yáaweefa márunnai óoru fínau.

¹⁴Óoru fídanoo Mooseefa Isaraee máqannaa úriqararausa maaqí qímasee qímanniminau. Ínnee maaqóo úiqaana máqusaki máridaqa maaqandá qífeesiaqa. Áaroonafa faqa Hurafa faqa ínni faqa maaqóo márifaranoo. Akaqáusaki ufa rainárafa kambíqáinaqa miqandá andeeqá nímaqeefaranoo.

¹⁵Miqí qímasee qímannimiséenoo Mooseefa áaqanai óorufufanoo qasuru fánnoo áaqana rafáaqa finau.

¹⁶Yáaweefa káaqa qárafa áaqana aaqá qumuroonára Sínái áaqana saa qasuru qúminau. Isaraee máqannaasa mi kaaqa qaranná qáfoofanóo áaqanasaa firaa ida qéera foorá qímarinau. Dínni ani moodáa marasée 6 faasaanná qasuru fannoo áaqana rafáaqa fínoo márinau. Dínni ani qaara qánda marasée 7 fáasaanna Yáaweefa qasurukíqari Mooseenara maí úruanneé qinau.

¹⁷Faiqí ánaasee afaasásaa márusa áaqana qáfeeqa náaquqara kúdifaannámmíifoo qiqau. Ánutuna káaqa qárafa áaqana saa firaaqóo idáùruara foorá ímarinau.

¹⁸Mooseefa áaqanai óoru fídanoo qasurukí kéeqàkufanoo áaqanasa óoru qaara fasiqa níku nísauku taikásee 40 eendáki faqa fáasaana faqa márinau.