Nehemiah 6

1

2

3

4

5

6

7

8

9

10

11

12

13

¹I Sanballat, Tobiah, Geshem, nge tin kabay e to’ogor romad e ra nanged ni ku gu mu’gad i ubung bayay fare yoror. Ni go’ mab ko pi garog e dawor ni suweg nga langan e garog.

²Ma aram me pi’ Sanballat nge Geshem e thin nge yib ngog, ni yow be yog ni nggu mada’gad ngalan reb fapi binaw nu Ono. Ma kugnang ni bay rogon ni ka ra pur’uy nigew ni ngar gafgow nigewgag.

³Mu gu l’oeg e pi tamal’og ni nganog ngorow ni ngan ga’ar, “Gu be rin’ ba maruwel nib ga’ fan, ere dabiyag ni nggub. Dab gu taleg e maruwel ni bochan e nggub gguymew.”

⁴Aningeg yay nra pi’ew e thin ngog ni nggu mada’gad, mra taw bayay e mulwol rorow ma ta’ab fulweg e ug pi’.

⁵Ma aram me l’oeg Sanballat reb e tapigpig rok ngog nike fek e gin lal e babyor i yib, ni da nning e brif riy.

⁶Ma thin ko fare gi babyor e ga’ar: “Keyog Geshem ngog ni be yan ba thin rok e pi nam ni yad ba chuchugur ni gur nge pi Jew e kam leam niged ni ngam togopluwgad ere aramfan ni gimed be ngongliy bayay fare yoror. Ma ku be yog ni ga be leamnag ni ngam pilung

⁷ma kam guy rogon boch e profet ni ngar weliyed u lan yu Jerusalem ni gur e pilung nu Judah. En ni Pilung e ri bayi rung’ag murung’agen e ran’ey, ere gu be yog ngom ni ngad mada’gow ngad puruy’ nigew.”

⁸Mu gu fulweg taban fare gi babyor ngak ni lungug: “Dariy ban’en nib riyul’ ko n’en nigabe yog. Gubin ma kam tunguy kamog.”

⁹Yad be guy rogon ni nggu rusgad nggu talgad ko maruwel. Mu gu meybil ni lungug, “Got mu gel nigeg e chiney!”

¹⁰Ngiyal’ nem mu gu wan gguy Shemaiah nib mo’on ni fak Delaiah ma tutuw rok Mehetabel, nike par u naun rok ndakir og nga wean. Me ga’ar ngog, “Thingar darow da mithgow ngalan fa gin nib Thothup u lan fare Tempel ngad man’ nigew e mab riy, ni bochan e yad be yib ni ngar thanged e fan rom. Nep e bay ra tawgad ni ngar thanged e fan rom.”

¹¹Mu gu fulweg ni lungug, “Gathigag fa miti girdi’ ni gu ma mil ngu’ug mith. Ga be leamnag ma gu ra yan gu mith ngalan e Tempel ni bochan e nggu ayuweg e pogofan rog? Dab gu rin’.”

¹²Mu gu par ngu’ug leamnag mu gunang ni gathi Got e ke non ngak Shemaiah, ya Tobiah nge Sanballat e kar pi’ew talin ni nge yibi ginangeg.

¹³Kar pi’ew puluwon ni nge k’aring e marus ngog nggu mul nga fithik’ e denen, ya nge yag nra kirebnag thig miyow gafgow nageg.

¹⁴Mu gu meybil ni lungug, “Got, mu tay u wun’um e n’en nike rin’ Tobiah nge Sanballat ngam gechignag row. Ma dabi m’ay u wun’um fare pin i Nodiah nge gubin e profet ni yad be guy rogon ni ngar k’aringed e marus ngog.”

¹⁵Tomren wugem nge l’agruw e rran min mu’nag fare yoror ni ga’ngin ko rofen ni rliw’ nge lal ko pul ni Elul.

¹⁶Nap’an ni rung’ag e to’ogor romad nu lan e pi nam nib liyegmad nike m’ay fare maruwel, me m’ay e liyab rorad, ya go’ kan nang ni Got e ke ayuweg fare maruwel ke m’ay.

¹⁷Aram n’umngin nap’an ma pi tayugang’ ko Jew yad ma fulweg taban e babyor nma pi’ Tobiah.

¹⁸Bo’or e girdi’ nu Judah ni go’ yad ba fol ngak ni bochan e re mo’on ni chitamngin e re pin ni le’engin e ba Jew ni aram Shekaniah nib mo’on ni fak Arah. Ma ku er i tay Jehohanan nib mo’on ni fak nike le’engiy be’ ni bpin ni fak Meshullam nib mo’on ni fak Berekiah.

¹⁹Ma be weliy e girdi’ u p’eowcheg murung’agen urngin e tin nib manigil nike rin’ Tobiah, mu gog ban’en miyad kunuy ni gubin ngar weliyed ngak. Ma de toffan ko yol babyor ngog ni be guy rogon ni nge k’aring e marus ngog.