1Ma bĩi bò má yã̀a à foo kú gukea dↄro, mↄde mɛ́ɛ à bĩilɛ gbànↄ pɛ́ɛpɛɛ gĩaro. Kɛ̀ Sambala kↄ̃n Tobiao kↄ̃n Larubu bori Gɛsɛmuo kↄ̃n ma ibɛɛ kpaaanↄ à baaru mà,
2Sambala kↄ̃n Gɛsɛmu pìo lɛ́kpãsã kɛ̀mɛ wà bè mà mↄ́ mà dańlɛ Onↄ guzurɛ lakutu ke guu. À zaaan aↄ̃ↄe wɛtɛɛmao.
3Ma gbɛ̃nↄ zĩ̀ḿma ma bè: Mɛ́ɛ zĩ bíta kɛɛmɛ, mɛ́ e mà mↄ́ro. Mɛ́ e mà zĩi pì tó mà mↄ́ a kiiaro.
4Aↄ̃ lɛ́kpãsã pì kɛ̀mɛ gɛ̃̀n siigↄ̃, ben ma yã mɛ̀n doo pì sìńla.
5À gɛ̃̀n sↄↄrode Sambala a ìba ke zĩ̀ma. À takada kɛ̀ wèe kãɛ'ↄ naaro kũna.
6Wà kɛ̃̀ lá pì guu wà bè: Wa yãke wàpe mà bori pãndenↄ kiia, ben Gɛsɛmu bè yãpuramɛ. À bè mpi kↄ̃n Yuda kpaaanↄ a zɛo à bↄ kína yã kpɛɛmɛ. Beee yãnzin ée bĩi pì bozi. Wà bè dↄ ń yezi ǹ gↄ̃ Yudanↄ kína ũmɛ,
7ben n annabinↄ dìɛ aↄ̃ o Yerusalɛmu kɛ̀ ḿbe ń kína ũ. Kína é yã pì ma. Beee yãnzin ǹ mↄ́ wà lɛ́ kpakↄ̃sↄ̃zi.
8Ben ma lɛ́kpãsã kɛ̀nɛ ma bè: Yã kɛ̀ nɛ́ɛ oo kuuro. Ḿbe n yã pì ò n zĩndaa.
9Aↄ̃ píngi aↄ̃ↄ yezi vĩa ma kũmɛ, aↄ̃ↄe daa wa ↄↄ é gↄ̃ dↄwazimɛ, wé e wà zĩi pì mì dɛro. Ma Luda, ǹ ma ↄↄ gba gbãaa.
10Ma gaa Delaya nɛ́ Semaya, Mɛtabɛli dio bɛ, zaakɛ à a zĩnda yì a kpɛ́n. À bè: Wà kpakↄ̃a Luda kpɛ́n wà à gbà tatawalɛ, zaakɛ gbɛ̃nↄↄ e mↄↄ n dɛmɛ. Aↄ̃é mↄ́ wà n dɛ gwãavĩmɛ.
11Ben ma bè: Ma taka è bàa síↄ́? Ma taka é fↄ̃ à gá utɛ Luda kpɛ́n ma zĩnda mìsina yãnziↄ́? Mɛ́ gáro.
12Má dↄ̃ ma zĩndaa à yã pì e bↄ Luda kiiaro. À annabikɛyã pì ò ma yã musu kɛ̀ Tobia kↄ̃n Sambalao fĩa bònɛ yãnzimɛ.
13À fĩa bònɛ lɛ vĩa e à ma kũ mà durun kɛ mà gá gwe, aↄ̃é gbasa wà ma tↄ́ yaka wà ma sↄ̃sↄ̃.
14Ma Luda, Tobia kↄ̃n Sambalao yãkɛna pì gↄ̃ dↄngu. Nↄgbɛ̃ annabi Nↄadia yã gↄ̃ dↄngu dↄ kↄ̃n annabi kpaaa kɛ̀ aↄ̃ↄ yezi vĩa ma kũnↄ.
15Gurↄ baplaa akuri awɛɛplaaa gbɛra wà bĩi pì mì dɛ̀ Ɛlulu mↄ gurↄ baaasↄↄrodeea.
16Kɛ̀ wa ibɛɛnↄ à baaru mà bensↄ̃ borii kɛ̀ aↄ̃ↄ liganawaziinↄ wɛ́ɛ sìàlɛ, aↄ̃ kã gà aↄ̃ dↄ̃̀ sa kɛ̀ wa zĩi pì kɛ̀ kↄ̃n wa Luda gbãaao.
17Gurↄ beeean Yudanↄ kínɛnↄↄ e takada kpãsãa Tobianɛ pari, bensↄ̃ Tobia pì e kpãsãańnɛ.
18Yudanↄ yã yìo pari, zaakɛ Ara nɛ́ Sɛkanian à anzure ũ bensↄ̃ Bɛrɛkia nɛ́ Mɛsulamu bé Tobia nɛ́ Yoanana anzure ũ.
19Aↄ̃è à sáabu kpá ma wáa dↄ, ben aↄ̃è ɛara wà ma yã tↄ̃kɛ̃nɛ. Tobia pì lánↄ kpã̀sãmɛ dↄ lɛ vĩa e à ma kũ.
