NƐƐMAYA 6 - Luda yã takada kũ Bisã yão

NƐƐMAYA 6

Click on verse(s) to share them!

¹Ma bĩni bò ma làka a foro kú gukea doro, ama mádi a bĩnilɛ gbànↄ pɛ́tɛpɛtɛ gĩaro. Kũ Sambala kũ Tobiao kũ Larubu buri Gɛsɛmuo kũ ma ibɛrɛ kparanↄ a baaruu mà,

²Sambala kũ Gɛsɛmu pìio lɛ́gbãzã kɛ̀mɛnɛ ò pì mà mↄ́ mà dańlɛ Onↄ guvutɛ lakutu ke gũn. Yã vãnin òtɛn wɛtɛ kũmao.

³Ma gbɛ̃nↄ zĩ̀ḿma ma pì: Matɛn zĩ zↄ̃kↄ̃ kɛmɛ, mani le mà suro. Mani le mà zĩ pì tón mà su á kĩnaaro.

⁴Ò lɛ́gbãzã pìi kɛ̀mɛnɛ gɛ̃̀n siikↄ̃, akũ ma yã mɛ̀n do pìi sìńla.

⁵A gɛ̃̀n sↄↄrode Sambala a ìba ke zĩ̀ma. À takada kũ òdi kãni'ↄ naaro kũna.

⁶Ò kɛ̃̀ takada pìi gũn ò pì: O yãke mà burinↄ kĩnaa, akũ Gɛsɛmu pì yãpuramɛ. À pì mↄkↄ̃n kũ Yuda kparanↄ a zɛo à bo kína yã kpɛmɛ. Abire yãin átɛn bĩni pì bo. Ò pì dↄ ń ye ǹ gↄ̃ Yudanↄ kína ũmɛ,

⁷akũ n annabinↄ dìtɛ ò o Yurusalɛmu, mↄkↄ̃mmɛ ń kína ũ. Kína ni yã pì ma. A yã mɛ́ à tò ǹ mↄ́ ò lɛ́ kpákũsũ.

⁸Akũ ma lɛ́gbãzã kɛ̀nɛ ma pì: Yã kũ ntɛn o kunlo. Mↄkↄ̃mmɛ n yã pìi ò n zĩdaa.

⁹Ń pínki ò ye vĩna ma kũ ò pì, ó ↄ ni gↄ̃ dↄwáimɛ, óni le ò zĩ pì lákaro. Ma Luda, ǹ ma ↄ gba gbãna.

¹⁰Ma gɛ Delaya nɛ́ Semaya, Mɛtabɛli daikore bɛa, zaakũ à a zĩda yĩ̀ a kpɛ́n. À pì: Ò dakarɛ Luda kpɛ́n ò a gbà taólɛ, zaakũ gbɛ̃nↄ tɛn su n dɛmɛ. Oni su ò n dɛ gwãanimɛ.

¹¹Akũ ma pì: Ma taka dì bàa sí yá? Ma taka ni fↄ̃ à gɛ́ utɛ Luda kpɛ́n ma zĩda surabana yãi yá? Mani gɛ́ro.

¹²Má dↄ̃ ma zĩdaa a yã pì dí bo Luda kĩnaaro. À annabikɛyã pìi ò ma yã musu kũ Tobia kũ Sambalao fĩnaa bònɛ yãimɛ.

¹³À fĩnaa bònɛ de vĩna le à ma kũ mà durunna kɛ mà gɛ́ gwe, gbasa ò ma tↄ́ yaka ò ma sↄ̃sↄ̃.

¹⁴Ma Luda, Tobia kũ Sambalao yãkɛnaa pì gↄ̃ dↄngu. Nↄgbɛ̃ annabi Nↄadia yã gↄ̃ dↄngu dↄ kũ annabi kpara kũ ò ye vĩna ma kũnↄ.

¹⁵Gↄrↄ bupla akuri awɛɛpla gbɛra ò bĩni pìi làka Ɛlulu mↄ gↄrↄ baraasↄↄrodea.

¹⁶Kũ ó ibɛrɛnↄ a baaruu mà akũsↄ̃ buri kũ ò likanawáinↄ wɛ́ sìalɛ, ń kã gà ò dↄ̃̀ sà kũ o zĩ pìi kɛ̀ kũ ó Luda gbãnao.

¹⁷Gↄrↄ birea Yudanↄ kínɛnↄ tɛn takada kpãzã Tobianɛ dasi, akũsↄ̃ Tobia pì tɛn kpãzãńnɛ.

¹⁸Yudanↄ yã yĩ̀ kãao dasi, zaakũ Ara nɛ́ Sɛkaniamɛ a anzure ũ akũsↄ̃ Bɛrɛkia nɛ́ Mɛsulamu mɛ́ à Tobia nɛ́ Yoanana anzure ũ.

¹⁹Òdi a sáabu kpá ma wára dↄ, akũ òdi ɛra ò ma yã babanɛ. Tobia pì takadanↄ kpã̀zãmɛnɛ dↄ de vĩna le à ma kũ.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

NƐƐMAYA 612456789

NƐƐMAYA 6
1
2
4
5
6
7
8
9