Miti Mumu Ŋic 8

1

2

3

4

5

6

7

8

9

10

11

12

¹Ŋic maŋɋârâŋheczi sawa wiacte wiac irec fuŋne mana taraekac. E maŋɋârâŋhec jume ʒâŋe mai‐ticne râŋgeŋnezi urueha fie ruruckeekac.

²Go ŋicwofuŋzi dâŋ mutâcne‐gareme mana rereŋ ezemec, ehuc ine Anuturao mumupaŋ dâŋ i ututuŋ jaha mi muzemec.

³Ŋicwofuŋ e wiac i me i ezo murâ eocmu, irec go ere maio fuarâ wiac irec me irec maname mi sâckeha qizec boc mi qazemec.

⁴Ŋicwofuŋte dâŋ i tâpiri‐ticnehec, irec ŋic moczi ʒiŋuc sâcne mi âzâcneocmu: “Go wemo wiac ekomec?”

⁵Go dâŋticne mana rereŋ erâ sâcne jucmu, â ŋicwofuŋte dâŋ i mo dameŋko weniŋuc ehuc reŋkezo i ŋic maŋɋârâŋheczi mana taraekac.

⁶Wiac sasawa ebac enaŋte dameŋ â hata bâfua‐nârekicne, ehame juku wiac weniŋucne fuaocmu i kâuc bahuc boc ŋemâckeeŋgopeneŋ, i mozi moc nâzâme mananʒapeŋ.

⁸Ŋic nâŋâc hâmoc sâcne mi wisecnenaŋmu â hâmoc dameŋ‐nâŋec âke suepene feocte tâpiri wâc mi fonâreekac. Hâmochec ʒika gie bapa i jujumana tâmiric, â eeatuc moc bâfuahuc sâcne wâc mi behenaŋmu.

⁹Ŋic jaŋe mâreŋko wiac ebac eeŋgopieŋ irec mamanasu gie bahuc wiac i sasawa mana tara‐fârepo. Ŋic gâcne jaŋe tâpirihec jueŋgopieŋ â gâcne jaŋe ine ŋic tâpirihec jaŋere rurumaŋko juhuc ʒâic manaeŋgopieŋ.

¹⁰No ŋic sindaŋne ʒâŋeruŋko ducjopapie honec‐jopapo, erâ ŋic jaŋe ʒâŋeruŋ gieonec risiehuc ŋic sindaŋne jaŋe ɋâricne juhuc hae‐jeŋicko wiac gâgâpâcne ejumbieŋ irec mumbiaŋ‐jopapie manapo. Wiac i wâc fâri tâmiric jaha.

¹¹Ŋic jaŋe wemocte afeckerâ wiac hehesicne boc eeŋgopieŋ? I okacne biac mi fisi‐jareekac irec.

¹²Sâqocne bapa moc e wiac hehesicne eme arecne 100 mecne eha sifu ʒuhuckerâ jufeku ŋicqizec eocmu. Erâ no ine sifu ʒiŋuc manakopac: Anutu araŋ bacnehuc jueŋgopieŋ jaŋe araŋ bapa‐jeŋicte jujuhâmo bâfuaniŋmu,

¹³â ŋic sindaŋne jaŋe ine jujuhâmo bâfuahuc dameŋ ʒora mi juniŋmu. Jaŋe Anutu araŋ mi bacneeŋgopieŋte juju dameŋ‐jeŋic i nâkumuc iŋucne fuarâ omaeocmu.

¹⁴Erâ i wâc fâri tâmiric jaha ekac. Manakic, mâreŋko wiac kecʒiŋuc fuaekac hâcne: Ŋic sindaŋne jaŋe okacne fua‐jareocte mukicne i ŋic tiŋne jaŋere faio feekac, â ŋic tiŋne jaŋe juju bapa‐jeŋicte furi roniŋte mukicne i ine ŋic sindaŋne jaŋe roeŋgopieŋ. No irec hâcne mukopac: Wiac i fâri tâmiric jaha ekac.

¹⁵Irec ŋic nâŋâc ʒeri bubiaŋ faio junaŋte mukicne i hata i me i âtehuc mâcne, nânâ opâ nâhuc ʒeri bubiaŋ ee hata i mocjaha fonârekac. Anutuzi juju dameŋ banârewec irec maŋnao ʒâic gie sâko bahuc wiac i sawa sâcne enaŋmu.

¹⁶No maŋɋârâŋhec erâ mâreŋko wiac fuarâ foekac irec fuŋne manapemurâ ʒoɋac sâko ehuc ʒiŋuc sawa mana tarapo: Nâŋâc ʒoaŋko me ŋafeo guŋɋâri juhuc mamana gie barâ

¹⁷Anutuzi wiac ebac eekac irec fuŋne i sifu mi mana taranaŋmu. Nâŋâc irec mamana gie samarierâ bahuc sifu mi mana taranaŋmu. Ŋic maŋɋârâŋhec jaŋe irec fuŋne manaŋgopeneŋ, iŋuc muhuc sifu kâuc baeŋgopieŋ wâc.