Megwewali 8

1

2

3

4

5

6

7

8

9

10

11

12

¹Wazà ebpekerepeng te uluwanen he etew, he metau he edseysey te menge egkengeulaula. Melipayen is kebuvuked te metau he etew ne kenà ebmerembunut.

²Tumana nu is suǥù te hadì su insaad nu ziyà te Megbevayà he ebeelan nu heini.

³Kenè nu pesegdana is ketengdanan nu ziyà te hadì, ne kenè ka medtampu te menge etew he ebpelanu ebaal te mezaat diyà te hadì, su egkehimu te hadì is minsan hengkey he egkesuatan din.

⁴Duen gehem te menge suǥù te hadì, ne wazà ebpekesupak kayi.

⁵Ne kenà egkemenu is minsan hentei he edtuman kayi. Is uluwanen he etew netuenan din ke keenu wey ke ebmenmenuwen is kebeeli te vuluhaten.

⁶Su is kada vuluhaten ne zuen hustu he timpu wey paaǥi te kebeeli zuen minsan mahabet he menge kelised is egkeetuvang te etew.

⁷Ne ǥeina te wazà etew he netau mehitenged te huziyan he timpu, ne wazà ebpekekaǥi ziyà te minsan hentei ke hengkey is egkehitavù.

⁸Is keramag kenà egkeeǥen te etew, ne kenà daan egkeeǥan te etew is kemetayen din. Kebpekidtebek heini he kenà egkepeliǥuyan. Ne is kelelalung te etew ne kenà ebpekelibri kandin te kemetayen.

⁹Neehè ku heini langun hein mid-isip-isip ku is mehitenged te minsan hengkey he ebpen-ul-ulahan kayi te kelibutan, iring te emun is sevaha he etew he zuen din gehem te kedezaat te zuma zin he etew.

¹⁰Ne neehè ku zaan is menge lalung he inleveng. Heini sikandan layun edseled diyà te segradu he inged he iyan is Jerusalem ne zutun sikandan mebaal te kelelalung. Ne zutun daan sikandan mezeliǥi te menge etew. Wazà kayi pulus.

¹¹Emun kenà segugunà edhukumi is etew he ebpekesalà, ne ebpekeisip daan is duma te kebaal te mezaat.

¹²Minsan utew mezakel is salà te etew, egkehimu ǥihapun he edluǥeyazan sikandin te untung. Tutuu iyan he netuenan ku he meupiya is egkehitavù diyà te etew he edtahud te Megbevayà,

¹³ne mezaat is egkehitavù diyà te lalung he etew he kenà edtahud te Megbevayà, ne kenà sikandin egkembuwayan, kekenà, egkeiring is untung din te lambung he meǥaan dà egkaawà.

¹⁴Piru zuen egkengeulaula kayi te kelibutan he kenè ta egkesavut. Usahay iyan is metazeng ebpekezawat te silut he para pezem te lalung he etew, ne is lalung iyan ebpekezawat te suhul he para pezem te metazeng. Ne iyan egkekaǥi ku is wazà kayi pulus.

¹⁵Umbe para kediey, iyan meupiya he ed-ul-ulahan te etew is kedlipey kayi te kebpengungubpaan din. Wazà duma he meupiya para kandin kayi te kelibutan, kekenà, iyan is kegkaan, ked-inum wey kedlipey. Pinaaǥi kayi egkeseǥazan din is kelipey zutun te kedterebahu zin seled te tivuuk he untung din he imbeǥey kandin te Megbevayà kayi te kelibutan.

¹⁶Maandew wey mezukilem kenà a ebpekelipezeng tenged te kebpeninguhè ku he maangken ku is ketau he iyan igkesevuta ku te egkengeulaula kayi te kelibutan.

¹⁷Neehè ku is langun he mibpemeelan te Megbevayà kayi te kelibutan, ne wazà etew he ebpekesavut kayi. Minsan sengemenu pa is kebpeninguhà te etew he mesavut din heini, ne kenè din heini egkesavut. Minsan egkaǥi pa is metau he etew he nesavut din en heini, piru iyan tutuu is wazè din heini mesavut.