1Go taha ufuŋko fezo murâ rucjarige bahuc fezemec. Ferâ Wofuŋ dâŋticnere hazec râetec mana‐garepe fefene eocmu, â ŋic mutuc matacne jaŋe tiŋne â hehesic jahere fuŋne mi mana tarahuc bâzi rikeeŋgopieŋ irec sâc etec ine mana‐garepe wawahane eocmu.
2Go dâŋ moc muzo murâ qanaŋ manasu biric ezemec, ehuc Anuture maio fâro faio mumupaŋ dâŋ mi muzemec. Anutu e sambâŋko jukac, â go ine mâreŋko jukomec, irec dâŋ afecne sawa muzemec.
3Go mana mezac boc ehuc guŋ sâqocne bocjaha manacmu, â dâŋ bocjaha mu raʒic wefuc ehuc mumusifuc dâŋ mucmu hâcne.
4Go Anuturao mumupaŋ dâŋ moc mucmuo ine irec fârine bâfuacmurâ ʒoɋac ezemec. E ŋic mutucne jaŋere mi ecneekac, irec go mumupaŋgere fârine bâfuazemec. Go, mumupaŋ‐nanere fârine sâcne mi bâfuapemu, iŋuc muhuc mumupaŋ dâŋ moc mi muzemec.
6Dâŋ musifuckehuc sâqocne bâfuazicte nameŋge soŋaŋkezemec. Go ʒâhec taha bapare maio ʒiŋuc muzicte iŋuc ezemec: No fâro ehuc musifuckepac. Go wemocte dâŋgezi Anutu aaric bâfuacnehuc giegere fârine hetâtieocte mukomec?
7Go guŋ bocjaha manaekicte dâŋ racne boc muekic, erâ sifu Anutu araŋ bacnetec sâckezejec.
8Go kia gawamaŋ jaŋe ŋic qarâ suriŋne bâʒâic‐jopahuc dâŋgieo mi bafic‐jopaniŋmu â dâŋjeŋic mi dopeckeniŋmuo ine mi wareckezemec. Kia fekicne jaŋe kia wahakicne ŋezic‐jopaeŋgopieŋ, â gawamaŋ kâcɋenezi kiafâc‐ticne fekicne â wahakicne mâmâc ŋezic‐jopa‐fâreekac.
9Irec mâreŋ moc e ŋicwofuŋ‐ticne jume sâckeocmu.
10Ŋic moc e moneŋte boc ecneocmuzi moneŋte harac jaha ehuc juocmu, â ŋic moc e moneŋ mafa sâkohec eocte manasuhuc wiac sasawa rozo muocmu i mi bâfuaocmu. Irec hata i fâri tâmiric jaha ekac.
11Ŋic moc e moneŋ mafa sâkohec juocmu e ŋic bocjaha jaŋe nânâ jare gumec eocte muniŋmu, ehame wemo wiac fârine moc bâfuaocmu? E mâc ʒiŋuc sawa mana taraocmu: No mafa mâriri sâkohec juekopac.
12Kiŋaŋ qaqa moc e nânâ wiac bocjaha me afecne sawa nâhuc sifu guŋ biaŋne foocmu, â ŋic moneŋ mafa sâkoheczi ine wiac sasawa‐ticnere mana mezac boc ehuc guŋɋâri juocmu.
13No mâreŋko wiac hâhâwicne kecʒiŋuc fuame honeekopac: Ŋic jaŋe ʒâhec wiac i me i moc basanʒipiŋte moneŋ‐jeŋic ro qâzuc eeŋgopieŋ.
14Erâ juku wiac kosa ehuc behepie omae‐fâreha naru motecfâc‐jeŋic jareniŋte basaeŋgopieŋ. Ŋic nâŋâc mâreŋko metariŋ fuambeŋ iŋuc jaha juku hâmorâ metariŋ jaha ranaŋmu. Nâŋâc gie sâko bahuc jueŋgopeneŋ, erâ sifu irec fârine i me i moc mi baranaŋmu.
16Wiac izi mi sâckeekac. Nâŋâc fuambeŋ irec sâc jaha ranaŋmu. Nâŋâc ʒocne fârone ehuc mezi mâŋâŋ rorâ basanaŋkezo gie sâko baeŋgopeneŋ, ehuc irec fârine wemo wiac bâfuaeŋgopeneŋ?
17Dapâcmaŋko juju, â busâqoc â memezac â aaric â huc ʒâic faio juju bâfuaeŋgopeneŋ hâcne.
18Manaŋgopieŋ, no wiac ʒiŋuc hone mana tarac ekopac: Nâŋâc Anutuzi juju dameŋ bembeŋne nârewec irec maŋnao gie bapene fârine fuaekac irec ʒeri ehuc nânâ opâ nâpene biaŋkeocmu. Ŋic nâŋâc iŋuc hâcne enaŋte munârekicne.
19Anutu e ŋic nâŋâc moneŋ mafa â fic hae nâre tahac ehuc irec bubiaŋ mananaŋte mana‐nâreocmuo ine daŋge mumuteŋ enʒepeneŋ, ehuc gie bapene fârine fuaekac i bubiaŋ manahuc nâ bac enʒepeneŋ. Wiac i Anuturaonec taha moc hâcne.
20Ŋic nâŋâc ʒeri bubiaŋ faio junaŋte Anutuzi mana‐nârewec, irec juju dameŋ‐nâŋec bembeŋnere mana mezac boc mi enʒepeneŋ.
