Miti Mânec 86:2-17

²No mitihec jukopacte juju‐nane soŋaŋkec, kiŋaŋŋicge no gorao roweckekopacte baficnuc.

³Go Anutu‐nanezi aki anonoc enarec; o Wofuŋ, no ʒoaŋ ʒora wira‐garehuc jukopac.

⁴Kiŋaŋŋicge no bunane bâmiriŋkec, maŋnane, Wofuŋ, gorao sâsepe hefakac.

⁵O Wofuŋ, go buuruc ehuc kiŋ bebehere afeckeekic, â wira‐gareeŋgopieŋ jaŋe aki anonoc boc ejareekic.

⁶O Wofuŋ, go nunumu‐nanere hazec râec, wira wâwâsic egarekopac i manac.

⁷Ʒârâ hâriŋ fua‐nareme sâc wâsicguekopac, goki hâcne micnaneo roekic.

⁸O Wofuŋ, nemu jaŋeraonec moczi gore sâc mi jukac, erâ wâc gie goki bameŋ iŋucne moc mi bakicne.

⁹Qâpuc guru bâfuac‐jopameŋ jaŋe fisirâ, Wofuŋ, gore maio dapeniŋmu, ehuc gore ʒâŋe muafeckeniŋmu.

¹⁰Go hâcne kâcɋene jukiczi mâsi baekic, go mocjahazi Anutu jukomec.

¹¹O Wofuŋ, go hatage qazu‐narec, eme dâŋfârigere maŋnao juzepac; maŋnane qâzucketec ʒâŋege araŋ bacnezepac.

¹²Wofuŋ Anutu‐nane, no maŋ hâcbuc jaha, go muteŋgupe, erâ ʒâŋege muafeckehuc juzepac raŋɋa raŋɋa.

¹³Go aki anonoc fekicne enarehuc juekic hâcne; go juju‐nane hâmoc haere ʒâkâŋkonec baefumeŋ.

¹⁴O Anutu, ŋic ʒaubacnezi imacnuniŋte faharembieŋ; ŋic masu wânʒâŋheczi roroc embieŋ, juju‐nane hetâcnezo muŋgopieŋ; erâ jaŋe gorao ʒâŋe mi fiŋgopieŋ.

¹⁵Wofuŋ, go ine Anutu maŋuruc â aki anonocgehec, kimbeŋge uneŋne, â maŋgao aki anonoc â jauŋ fâri fusucmawec fokac.

¹⁶Noraopec fotikierâ nore buge sâqoreoc; kiŋaŋŋicge no tâpiri henaretec huoc, â kiŋaŋ narugere ŋokâ no baficnuc.

¹⁷No âgo enarekic irec fuŋne bataniŋkec; eme qaisocnuŋgopieŋ jaŋe ʒiŋuc honenʒepieŋ: Wofuŋ, go baficnuhuc bâmiriŋnukomec; iŋuc honerâ mimienʒepieŋ.