SALMOS 86:2-17

²Bwia neda' dan' naka' chio'. Dios chia', beslá neda', wen žin chio', dan' žx̱en ḻaža'a Le'.

³X̱ana' Dios, beyache' ḻaže'l neda', dan' žḻiža' Le' dot ža, dot yele.

⁴Ben ga yebéḻe'ela' neda', wen žin chio', dan' ẕzoa kwina' ḻo no'o Le', X̱ana' Dios.

⁵Nako' Le' chawe', X̱ana' Dios, na' ženít ḻawo'o neto', na' žeyache' ḻáže'tezlo' benne' ka' žḻížgake' Le'.

⁶X̱ana' Dios, benle da' ẕcháḻjḻena' Le', na' bze nag da' ẕnnabla' Le'.

⁷Ḻo ža kwe' zedḻa' wḻižkza' Le', dan' žechébekzo' Le' chia'.

⁸X̱anto' Dios, bi zoa no benne' nake' dios ka nako' Le' na' bi zoa no benne' gak gone' ka nak da' žono' Le'.

⁹Beno' Le' benne' ka' nníta'gake' yógo'te yež ka'. Ḻá'gake', na' wká'n ẕéngake' Le', X̱anto' Dios, na' wká'n ẕéngake' La la'y chio',

¹⁰dan' nako' ẕen, na' žono' da' žonen ga žebanlto'. Tozo' Le' nako' Dios.

¹¹Bsedle neda' da' žak ḻažo'o gona', X̱ana' Dios, na' gona' da' naken dot da' li chio'. Bchi'le ḻáẕda'wa' nich žeba' La la'y chekzo' Le'.

¹²Dot ḻaža'a wká'n ẕenkza' Le', X̱ana' Dios, na' wká'n ẕenkza' La la'y chekzo' Le' to chi'ize,

¹³dan' žeyache' ḻáže'tezlo' neda', na' besló' be' da' nakkza' ḻo yi' gabíl.

¹⁴X̱ana' Dios, benne' ka' ẕka'n ẕen kwíngake' ẕdíḻ-ḻengake' neda'. Zej nake' benne' yichj ža'a ka', na' žénegekle' gótgake' neda', na' bi ẕžébegake' Le',

¹⁵san Le', X̱ana' Dios, žeyache' ḻáže'lo' neto'. Nako' ẕen ḻaže', na' bi ẕžo'o to chi'ize, san žeyache' ḻáže'tezlo' neto', na' nako' dot ḻi ḻaže'.

¹⁶Bwia kan žak chia', na' beyache' ḻaže'l neda'. Benn neda' yeḻa' wak chio', neda' wen žin chio', na' wdape chi'i neda', ẕi'n no'le wen žin chio'.

¹⁷Bḻoe'el neda' to da' gak bian' gak chawe' chia', na' ben ga benne' ka' bi ẕḻé'egekle' neda' chawe' ḻé'egeklen', na' yedoé'egekle', dan' Le', X̱ana' Dios, gókḻenkzo' neda', na' beyón ẕeno' neda'.