Salmos 86:2-17

²Gam munashayquinömi nogaga rurä. Chapaycamay ari. Gammi canqui Diosnë. ¡Gamman yäracamoj sirbishojniqui caycaptëga salbaycamay ari!

³Tayta Dios, imay örapis gamtami mañacaycämö. Cuyapaycamay ari.

⁴Tayta Dios, gamtami mañacaycämö. Gamta sirbiycaptëga cushicaycachimay ari.

⁵Tayta Dios, gamga canqui allimi, imapitapis perdunajmi. Amatarmi cuyanqui gamman mañacamojcunataga.

⁶Tayta Dios, mañacamushätaga wiyaycuy. Ruwacamushätapis wiyaycamay.

⁷Llaquicushä öra gamta mañacamö imaypis yanapämaptiquimi.

⁸Tayta Dios, manami gamnöga canchu. Gam rurashayquitano ruräga manami pipis canchu.

⁹Tayta Dios, gammi camacächishcanqui nasyuncuna cananpaj. Chay nasyuncho tiyaj runacunami adurashunquipaj, alabashunquipaj.

¹⁰¡Gam japallayquimi Diosga canqui! Gamllami canqui munayniyoj, milagrucunata rurajpis.

¹¹Tayta Dios, sumaj tantiyachimay gamta wiyacunäpaj. Chauraga mana cachaypami sirbishayqui. Shacyächimay llapan shongöpa gamllata aduranäpaj.

¹²Tayta Dios, llapan shongöpami alabashayqui, adurashayqui.

¹³Nogataga fiyupami cuyamanqui. Wañunäpitami salbamashcanquipis.

¹⁴Tayta Dios, gamta mana yarpäshojcuna, mana rispitacojcuna wañuchicojcunami conträ ricacusha. Wañuchiytami munarcaycäman.

¹⁵Tayta Dios, chaypis gamga canqui alli shongumi, cuyapäcojmi, pasinsacojmi, cuyacojmi, rasun cajta rurajmi.

¹⁶Ricäramushpayqui ¡cuyapaycamay ari! ¡Sirbishojniquitaga salbamay! ¡Callpä cananpaj yanapaycamay!

¹⁷Cuyapäcoj cashayquita musyachimay. Chayta ricar chiquimajcunaga pengacongami. Tayta Dios, gammi yanapämashpayqui cushicachimanqui.