Psalm 86:2-17

²Moliyula liki misa tuh nga inse pwaye nu sum, Moliyula, tuh nga mwet kulansap lom ac nga lulalfongi kom.

³Kom God luk, ke ma inge pakoten nu sik; Nga pre nu sum ke len nufon.

⁴Oru tuh mwet kulansap lom in engan, O Leum, Tuh pre luk sowak nu yurum.

⁵Kom arulana wo nu sesr ac kom nunak munas nu sesr, Yoklana lungkulang lom nu selos nukewa su pre nu sum.

⁶Porongo pre luk, O LEUM GOD, Lohng ke nga tung in suk kasru sum.

⁷Nga pang nu sum in pacl in ongoiya Mweyen kom topuk pre luk.

⁸O Leum, wangin sie god oana kom, Wangin sie ku in oru orekma su kom oru.

⁹Mutunfacl nukewa su kom orala Ac fah tuku ac epasr nu sum, Ac elos fah kaksakin fulat lom.

¹⁰Kom kulana ac kom oru ma sakirik. Kom mukena pa God.

¹¹Luti nu sik, O LEUM GOD, lah mea kom lungse nga in oru, Ac nga ac fah akos kom ke insiuk nufon. Luti nu sik in kulansupekom ke inse pwaye.

¹²Nga fah kaksakin kom ke insiuk nufon, O LEUM GOD luk, Ac nga fah fahkak ke fulat lom nwe tok.

¹³Fuka lupan lungse kawil lom nu sik! Kom moliyula liki lufin misa.

¹⁴O God, mwet filang elos tuyak lainyu, Ac sie un mwet sulallal kena uniyuwi — Mwet su tia lohwot nu sum.

¹⁵A kom, O Leum, kom sie God sessesla ke lungse ac pakoten; Kom mongfisrasr, kulang ac pwaye pacl e nukewa.

¹⁶Forma nu sik ac pakomutuk; Ase ku lom nu sik ac moliyula, Tuh nga kulansupwekom oana nina kiuk el tuh oru.

¹⁷LEUM GOD, oru sie ma in akpwayeye wo lom nu sik Tuh mwet su srungayu in liye ac mwekin kac, Mweyen kom kasreyu ac akwoyeyu.