Yontu 86:2-17

²Mɑ kɛ́ kʋpɑŋ kɛ́, kenti mɑ tɔɔ. Mɑ Ɩsɔ, mɑ kɛ́ nyɑ́ təmlɛ tʋ kɛ́, mɑ pɛtɑ-ŋ mɑ tɩ, wɑɑsɩ-m.

³Tɑcɑɑ nyənɩ mɑ pətɔɔtəlɛ. Nyɑɣɑ mɑ wiikinɑ pɑɑ ɩfemle nte.

⁴Nyɑ́ tɔɔ kɛ́ mɑ kɛɛsənɑɑ. Ɩlɛ hɛɛsɩ nyɑ́ təmlɛ tʋ mɑ, mɑ lɑŋlɛ.

⁵Tɑcɑɑ, n kɛ́ kʋpɑŋ kɛ́, nɑ ń hʋləɣɩ suulu. Nyɑ́ kʋpɑntʋ tɔɔwɑ mpɑ pɑ yɑɑkɩ-ŋ tɔ pɑ tɔɔ.

⁶Tɑcɑɑ ke ŋkpɑŋʋɣʋ nɑ mɑ kʋsələmʋtʋ nɩɩ mɑ wiinɑʋ.

⁷Mɑ yɑɑkɩ-ŋ mɑ lɑŋwɑkəllɛ kʋyɛɛŋ tɑɑ kɛ́. Mpi tɔ, n nɩɩkɩ mɑ nɔɣɔ.

⁸Hɑɩ, Tɑcɑɑ, Ɩkɔntɛ nɑtəlɩ tə tɑ nəɣəsənɑ-ŋ, pəyele nɔɣɔlʋ ɩɩ pəsəɣɩ nɑ ɩ́ lɑ nyɑ́ təmlɛ nɑtəlɩ.

⁹Piitimnɑɑ mpɑ pɑ tənɑ n ŋmɑwɑ tɔ, pɑɑ kɔɔ nɑ pɑ́ həntɩ-ŋ ɑtɛ, nɑ pɑ́ tʋ nyɑ́ hətɛ kɛ teeli.

¹⁰N kɛ́ sɔsɔ kɛ́, nɑ n lɑkɩ kɔkɔlɔ nyəm, nyɑ́ tike ntɛ́ tɑmpɑnɑ Ɩsɔ.

¹¹Hɑɩ, Tɑcɑɑ hʋlɩ-m nyɑ́ mpɑɑŋ, mɑɑ tɔ nyɑ́ tɑmpɑnɑ tɑɑ. Tʋ mɑ tɑɑ nɑ mɑ́ wɛɛnɑ nyɑ́ sɔɣɔntʋ.

¹²Tɑcɑɑ, mɑ Ɩsɔ mɑɑ sɑ-ŋ nɑ lotu kʋlʋmtʋ, nɑ mɑ́ tʋɣɩ nyɑ́ hətɛ kɛ teeli kɛ tɑm tɔɔ.

¹³Nyɑ́ kʋpɑntʋ tɔɔwɑ mɑ tɔɔ kɛ́, nɑ ń yɑkɩ mɑ ləsɑɣɑ kɛ ɑtɛtəlɛ lumɑŋ tɑɑ.

¹⁴Hɑɩ, Ɩsɔ, kɑlɑmpɑɑnɩ nyə́mɑ kʋlɑ mɑ tɔɔ, mʋsʋntʋnɑɑ kpekəle cɑɑkɩ mɑ weesuɣu ləsʋɣʋ.

¹⁵Amɑ Tɑcɑɑ, nyɑ́ kɛ́ suulu tʋ kɛ́, nɑ ń wɛnɑ pətɔɔtəlɛ. Nn mʋɣɩ pɑ́ɑ́nɑ́ kɛ lɔŋ, nyɑ́ kʋpɑntʋ tɔɔwɑ, nɑ n lɑkɩ ɩsənɑ n sɩɩwɑ tɔ.

¹⁶Nyənɩ mɑ pətɔɔtəlɛ nɑ ń kɛɛsənɑ mɑ tɔɔ, hɑ nyɑ́ təmlɛ tʋ mɑɣɑ toŋ. Mɑ kɛ́ nyɑ́ nyəŋ kɛ́ wɑɑsɩ-m.

¹⁷Lɑ-m mpi pə hʋləɣɩ nyɑ́ kʋpɑntʋ tɔ, mɑ kolontunɑɑ ɩ́ nɑ́ nɑ pə tʋ-wɛɣɛ fɛɛlɛ. Mpi tɔ, nyɑ́ wɑɑsəɣənɑ-m nɑ ń hɛɛsəɣɩ mɑ lɑŋlɛ.