Miti Mânec 22:4-23

⁴Mimiŋnefâc‐nâŋec jaŋe gorao roweckembiŋ, roweckepie goki batarac‐jopameŋ.

⁵Wira wâwâsic egarepie asao rocjopameŋ; gorao roweckembiŋte mi qurutuambiŋ.

⁶No ine ɋâsu, no ŋic mâcne; ŋiczi nifepupu enareŋgopieŋ, ŋic ŋokac jaŋe mana wahacnuŋgopieŋ.

⁷Honecnueŋgopieŋ jaŋe mururuc enare‐fâreeŋgopieŋ, mecpiroc enarehuc qizec fofotaric enarerâ mueŋgopieŋ:

⁸“E mamanasiŋ‐ticne Wofuŋtao râeme fowecte eki bataraoc, â ere ecnekacte asa feferaŋko rooc me!”

⁹Goki hâcne neŋgoc bumaŋkonec enaretec fuapo, goki moŋ nâhuc fohape ŋezicnumeŋ.

¹⁰Fuapoonecteaŋ gorao fosiŋnerâ foekopac, neŋgoczi rocnuweckonecteaŋ Anutu‐nane erâ juekic.

¹¹Irec ʒi ʒârâ ʒâpâzi bâmbeŋnukacko, â babafic‐nane moc mi jume honekopacko, goki taicko mi mac junarec.

¹²Râsi bocjahazi bulimakao iŋucne somâcnuŋgopieŋ, Basaŋkonec bulimakao momori jaŋe orâŋnuŋgopieŋ;

¹³no maicnuhuc micjeŋic aŋkeŋgopieŋ, laioŋ wânʒâŋ iŋucnezi owacke‐nareŋgopieŋ.

¹⁴Opâ iŋucne hoŋnupie ŋeratierâ fokopac, me kike bibiric‐nane ŋetara‐fârejec; buhândâŋ‐nane sâfâ iŋucne ejec, bumaŋ‐naneo oopâne fuahuctecne.

¹⁵Tâpiri‐nanezi hahaŋkerâ kuʒi dâkâ iŋucne ejec, nameŋ‐nanezi ŋaŋarac‐naneo bohotakac, hâmocte meo râecnukomec hâcne.

¹⁶Ojai, sâqocne bapa guruzi orâŋnuŋgopieŋ, qâto iŋucne rârec bârârec doma raŋgopieŋ, me kike‐nane âke mârâŋkembieŋ.

¹⁷Siec‐nane tâtâc fuame sâcne wowosene ekac, râsifâc‐nane jaŋe fipie wareme honecnuhuc kiwaeŋgopieŋ.

¹⁸Jaŋe ŋaqi‐nane ɋâsâi qahuc rusâc eŋgopieŋ, â rurufa‐nane rune âke fuaocte ɋâsâi qaŋgopieŋ.

¹⁹Erâ Wofuŋ go ine taicko mi juc! Tâpiri‐nane, go ʒocnehec ware baficnuc!

²⁰Juju‐nane ʒikaonec batarac, mocjaha‐mae qâto jaŋere meonec batarac.

²¹Laioŋ jaŋere michaweckonec rocnuc, kâte bulimakao jaŋere ʒuŋeonec bataracnuc.

²²No ʒâŋe biŋege qomâfâc‐nane mutaniŋke‐jarepe, kikefuŋ guruo ʒeri mumuteŋ egarepe:

²³“Wofuŋ araŋ bacneeŋgopieŋ ŋoŋe e mumbiaŋkeniŋ, Jakobore ɋâricfâc sasawa, ŋoŋe e sâseniŋ, Israere gurufâc sasawa, ŋoŋe dapecneniŋ.