Buk Song 22:4-23

⁴Bipo ol tumbuna bilong mipela ol i bilip long yu. Ol i bilip na yu helpim ol na ol birua i no daunim ol.

⁵Ol i beten long yu na yu kisim bek ol long han bilong ol birua. Ol i bilip tru long yu na bilip bilong ol i no lus nating.

⁶Tasol mi, mi olsem liklik snek bilong graun. Mi samting nating. Olgeta man i krosim mi na ol i givim baksait long mi.

⁷Olgeta manmeri i lukim mi na ol i tok bilas long mi. Ol i sutim tang long mi na tromoi het bilong ol.

⁸Ol i tok, “Yu save bilip long God. Bilong wanem em i no helpim yu na kisim bek yu? Sapos God i laikim yu, bilong wanem em i no helpim yu?”

⁹God, yu tasol yu kisim mi long bel bilong mama na mi kamap gut. Na yu lukautim mi long taim mi dring susu yet.

¹⁰Mi bilip long yu, taim mama i karim mi na i kam inap nau. Mama i karim mi nupela yet na yu stap God bilong mi.

¹¹Hevi i kamap long mi nau, olsem na yu no ken lusim mi. Mi no gat wanpela man bilong helpim mi.

¹²Planti birua i ranim mi olsem ol bulmakau man. Ol i strong tumas olsem ol strongpela bulmakau man bilong distrik Basan.

¹³Ol i redi long bagarapim mi, olsem laion i singaut nogut na i opim maus bilong kaikai abus.

¹⁴Strong bilong mi i pinis olgeta, olsem wara ol i kapsaitim nating na i pinis olgeta. Olgeta skru bilong bun i lus. Bel bilong mi i malumalum tru, olsem gris i kamap olsem wara.

¹⁵Nek bilong mi em i drai pinis, na tang bilong mi i pas long maus. Yu yet yu lusim mi na mi laik i dai olgeta.

¹⁶Dispela ol man nogut i raunim mi long olgeta hap olsem ol dok i banisim wel abus. Ol i sutim han na lek bilong mi long tit bilong ol.

¹⁷Olgeta bun bilong mi i kamap ples klia. Na dispela ol man i lukim mi, na ol i amamas long mi bagarap.

¹⁸Ol i tilim klos bilong mi na ol i kisim, na ol i pilai satu bilong makim wanem man i ken kisim saket bilong mi.

¹⁹Bikpela, yu no ken i stap longwe long mi. Yu save helpim mi oltaim. Na yu ken kam hariap na helpim mi nau.

²⁰Yu mas kisim bek mi bai ol i no inap kilim mi i dai. Helpim mi, na dispela ol man i olsem ol dok bai ol i no ken kilim mi i dai. Bai mi stap laip.

²¹Ol i laik pinisim mi olsem laion i kaikai wel abus. Ol i stap olsem ol wel bulmakau i laik sutim mi long kom bilong ol. Yu mas kisim bek mi long han bilong ol.

²²Yu mekim olsem na bai mi autim tok long ol brata bilong mi long strongpela wok yu bin mekim. Taim ol i bung bilong lotu bai mi go namel long ol na litimapim nem bilong yu.

²³Bai mi tok olsem, “Yupela ol lain bilong God, litimapim nem bilong em. Yupela lain bilong Jekop, litimapim nem bilong Bikpela. Yes, yupela lain bilong Israel, yupela lotu long em.