Mboe 22:4-23

⁴Muŋgu tumbuyam bizin tipase pu tau. Tiurla ku mi nu kamke zin.

⁵Mi indeeŋe ta titaŋroro u na, nu tatke zin pa pataŋana kizin. Tana tiur matan pu sorok na som. Pa tipase pu mi nu uulu zin.

⁶Mi nio na, iŋgi tomtom tire yo kembei tomtom som. Matan pasom yo mi tirepiili yo kembei motmooto toono leleene kana.

⁷Wal boozomen ta tire yo na, uten mbiŋbiŋ pio, mi tirepilpiili yo, mi tikamam seŋge pio.

⁸Tizzo ta kembei: “Nu so nu pase pa Yooba tau. Ambai. Mbot mi re ten. Ko itatke u pa pataŋana taiŋgi, som som? Kozobe ni leleene pu, so ikamke u kek!”

⁹Yooba, nu itum ta pazal zaala pio, mi anaŋ ikam yo ma aŋsu. Mi indeeŋe ta nio pikin siŋsiŋŋoŋ mi imar na, nu mborro yo ma aŋbot ambai.

¹⁰Pa indeeŋe ta anaŋ ikam yo ma aŋsu na, nu kam yo ma aŋwe lem. Tana ta muŋgu mi imar na, nu Anutu tio.

¹¹Tana mbot molo pio pepe. Pa iŋgi aŋbot la pataŋana leleene. Mi leŋ tomtom sa be iuulu yo som.

¹²Iŋgi koŋ koi bizin timar ma tiliukaala yo, kembei makau saŋsaŋŋan ki toono pakaana ki Basan ta mburanŋan na.

¹³Mi kwon ikakaaga mi zoŋon izirzir mar pio. Kalŋan izalla pio kembei laion ta petel zin mi tirru kan buzur.

¹⁴Tana kuliŋ imetmeete, mi tiroŋ imukurkur lup. Mi aŋmoto ma ŋgelbuk ileege yo.

¹⁵Mburoŋ ta imap kat. Mi ŋgureŋ na, ikerekere lup. Kauziŋ imamaaza, mi mioŋ isekap sala koŋ galablaaba. Pa nu zem yo ma iŋgi be aŋsula leŋ naala i.

¹⁶Iŋgi wal sananŋan timar ma tiliu yo kek. Zin kembei me saŋsaŋŋan ta dudut ma timar, mi tiŋaŋa mare pa kumbuŋ mi nomoŋ.

¹⁷Wal tina tire yo na, lelen ambai. Pa nio tiroŋ men ma ruŋguŋ isaana kat.

¹⁸Mi tiparrai mburu tio ma len len.

¹⁹Yooba, nio aŋkamam mburoŋ se ku tau. Tana mbot molo pio pepe. Loŋa mar mi uulu yo!

²⁰Pa nio aŋbot la zaaba kwoono kek. Tana kamke yo lak. Kokena me saŋsaŋŋan taiŋgi tipasaana yo pa mburan.

²¹Re. Laion taiŋgi tikamam be tikan yo. Mi makau saŋsaŋŋan taiŋgi tikamam be tikuruumu yo pa kan kandaara. Loŋa mi tatke yo pizin! A buri. Nu leŋ yo kek!

²²Nio ko aŋsoyaara urum pizin toŋmatiziŋ tio. Sombe wal ku tila tilup zin pa suŋŋana, nako aŋgaaba zin mi aŋwit urum.

²³Niom wal ta so komototo Yooba mi keleŋleŋ la kalŋaana na, kapakuri. Niom ta Yakop popoŋana kini na, kiwit uruunu. Niom Israel ta boozomen, komoto i.