Miti Mânec 17:3-14

³Go maŋnane esâickecmu me ŋafeo iqicnucmu, me ba esâic enarecmuo, ine mamanasu sâqocne mi bâfuacmu. Micnanezi aka mi qambaraŋkeekac.

⁴Ŋic jaŋe wiac kosa ehapie, no gore mic reŋkehuc, ʒika qaqa jaŋere hata mi âtepo.

⁵No gore itiroc bâjâpehuc jupo, hatage mi âte sifuckepo.

⁶No wâsicgukopac, Anutu, go micnaneo sâcne rocmu; hazec râerâ dâŋnane manac.

⁷Mâsi bahuc aki anonocgere fuŋne bataniŋkec; râsi wise‐jarehuc mefâregao dapeŋ bâfuaeŋgopieŋ, ŋic i jaŋere bâbâpiaŋ juekic.

⁸Ʒâŋe hândâŋge iŋucne bajucnuzemec, fakec rurumaŋgao hefacnuzemec,

⁹ŋic sindaŋne jaŋe sipiricnuzo eŋgopieŋ, râsifâc‐nane jaŋe hâmoc bâfua‐nareniŋte somâ râe‐nareŋgopieŋ hâcne.

¹⁰Wokemaŋ dâŋjeŋiczi busâqoc mamana bâniniŋke‐jarewec, micjeŋicko penaroŋ dâŋ fuaekac.

¹¹Jaŋe bâjâpecnu wareku orâŋnuŋgopieŋ, hetapaicnupie mâreŋko qarâ fopere ejarekac.

¹²Laioŋzi qowi kiocte ʒawieekac iŋuc eŋgopieŋ, laioŋ motecne uupicko ruc barâ foekac irec sâc.

¹³O Wofuŋ, go fahare maic‐joparâ herândiŋ‐jopac! Ʒikazi juju‐nane sindaŋŋic jaŋere meonec batarac.

¹⁴O Wofuŋ go megezi ŋic jaŋeraonec bataracnuc, juju kâdoc‐jeŋic mâreŋte wiacko fokac jaŋeraonec hâcne. Wiac bâmocke‐jaremeŋ izi hobu‐jeŋic fusucmazejec, naru motecfâc‐jeŋic jaŋe wâc sâcjopame jaŋere ɋiefâc jaŋe tiwâne ronʒepieŋ.