Ihi 17:3-14

³Ti avu aatoqi vaira are kankoma kera iri tavaanara. Te qora kaiqa varaarorave tivake vaurara, are entaqi ti avu aato muntukaqi tuanti taantima kera tavairera, are tavairaro kia viraqi te qora kaiqa autuarirava voqavanovata varianarove.

⁴Te ai uva koqemake iri vaunarara ti, vo vaiintinavu tiroriha nái kenauka ruquti varia aararaqaa kia te ni vaunarave.

⁵Te ai aaraqaa niha, kia te vi aararaqaahai vo aaraqaavata vetante verantemaqi ni vaunarave.

⁶Kotio, quqaama are ti uva iri varianarara ti, te ai aare vauro. Ho vate are nena aato ti timiharama ti uva iriane.

⁷Ai aumanto oru variaka are vika antua nimite variaravara tira, ai muntukavano tiriara vainara ti humiqehara tivata ruaruama timitaane.

⁸Are nena avuqaa koqema kera raqikianantema kera, tiqaavata raqikiana. Kokoraaravano aroka rairakero nai naati aqu amitaintema kera, are tiqaavata koqema kera raqikiramanta

⁹qora kaiqa vare variaka kia ti qoraiqama timitaata. Oho, navutaaka ti haru kareka ti ututumate variavo.

¹⁰Aaqurihama nimite varia okarava kia vikaqi vaimanta variara. Vika nái mahuta tivakeha nái nutuqai tuahere variara.

¹¹Oho, vika ti aiqu taararamaqi/uramaqi ani, ti ututumate, ti utu vataini rutahaa karekama auti variavo.

¹²Raioninavu aantau aru kareka autuantemake, vika ti haru kareka auti variara. Nora raionivano aantau arukareva kukeqavi vaintemake, vika tiriara aituti variara.

¹³Mpo Noravauvo, ani ti navutaaka hampata iqoka raquqira vihara vika naatara kaane. Nena iqoka paipeqohaira qora kaiqa vare variaka kauquqihaira ti ruaruama timitaane.

¹⁴Noravauvo, vataihainaa haikaraqai noraiqaake iri variakaqaahaira ti ruaruama timitaane. Vika nái qora kaiqa varaara kaara are nái qoraiqama nimitehara vika vaintivaravata naintivaravata qoraiqama nimitaane.