Salmos 17:3-14

³Be an-binsaed nue-dakdaed. Mutikidba an nue-ulubgi-binsamaid be baramidaed. Nue be an-wilubdaksad, ibmar-isgana be angi amissurgusad. An na sogsad, an-sunmakedgi an begi isguosurye.

⁴Be-igar-nued-mesisad-ular, dulemar-baigan-daedyobi an dasulid, ibmar-isgana-imakedgi an nanadisulid.

⁵Be-Igar-Maidba bur an nanadiid, a-igargi gwen an bangudisulid.

⁶Bab-Dummad, ar be an-abin-imakdasoggu, a-ular, an bese binnasuli goled. Wis be an-itoge, an bese-goled nue be itoge.

⁷¡Be-sabed-sunsoged be anga oyoge! Dulemar begi-bendakleged-amididamaladi, dulemar-isganamarse baregilledidamaladi, a-dulemar, be-ganguedgi be bendakdaed.

⁸Ar dule-isganamar angi dummad-yolenanaisoggu, igi be-ibyagwag na be akwe, deyobi, be an-akwemoga.

⁹Ar dule-an-oburgwebimalad bato an-walik guakwaa gudimarsoggu, igi gannir e-sakan-urba na e-mimmigan odukue, deyobi, be an-odukumoga.

¹⁰A-dulemar, dule-wiledaked satemalad, unnila na san-dummarba-imakedgi sunmakmalad.

¹¹An-isdarmalad-an-baregindimalad an-walikagusad, angi ukiar sabsur-yolemalaga, guakwaa gudimalad.

¹²Achumigur mas-gabiedyobi, an-isdarmaladde anbina gudimalad. Achumigur e-mas-gaega balidakagwar maidaedyobi, anbina gudimalad.

¹³Bab-Jehováʼye, ginebinne, an-isdarmalad-abin be nodage, an-isdarmalad be obelodage. Bab-Dummadye, be an-abonogega, be-es-suidgi an-isdarmalad be oburgwedage.

¹⁴Bab-Jehováʼye, be-gangued-nikadba, an-isdarmaladgi be an-onoge. We-dulemar unnila we-napnegginbi ibmar-nika gudimalad. We-dule-isganamar, be-ibmar-nuegan nue-nika gudimalad. E-mimmigan, e-babgan-sorba, a-ibmar-nuegan abingadimarmogad. Degine, e-wagangarmoga bela ibmar-nuegan obine abingadimarmogad.