SALMOS 17:3-14

³Masque tijhualtlachilía noyolo ica yohuali huan techyejyecojtoc, amo tleno amo cuali tijpantijtoc. Amo niquijtojtoc catli amo monequi,

⁴quen quichihuaj ne sequinoc. Na nimoiyocatlalijtoc tlen nopa iniojhui catli amo cuajcualme. Nijchijtoc senquistoc quen quiijtohua motlanahuatil.

⁵Nijtoquilijtoc moojhui huan amo nihuetztoc ipan tlajtlacoli.

⁶Nimitznojnotza, noTeco Dios, pampa nijmati technanquilis. Techtlacaquili huan techchihuili cuenta.

⁷Technextili moteicnelijcayo catli yejyectzi. Taya tiquinmaquixtía ica mochicahualis catli motemachiyaj ipan ta.

⁸Techmocuitlahui quen se quimocuitlahuía iixsitlal. Quen se piyo quintlatía ipilconehua ieltlapaltzala, nojquiya quej nopa techmocuitlahui.

⁹Techtlati tlen nopa amo cuajcualme catli nechyahualojtoque para nechmictise.

¹⁰Nelía mocualnequij huan quema camanaltij, san mohueyimatij.

¹¹Nechtoquilijtinemij campa ninentinemi huan san quichiyaj nopa tlatoctzi quema huelise nechtlahuisose tlalchi.

¹²Inijuanti itztoque quen tecuanime catli tlahuel mayanaj huan quinequij tecuase, huan motlatijtoque ostoijtic para quema se masehuali panos.

¹³Ximotlanana, TOTECO, xiquinnamiquiti. Xiquinchihualti ma motlancuaquetzaca moixpa. Ica momachete, techmanahui tlen nopa amo cuajcualme.

¹⁴Ica mochicahualis, TOTECO, techmaquixti ininmaco inijuanti catli san quipiyaj catli eltoc ipan ni tlaltipactli. Tijmiyaquilijtoc catli iniaxca nica. Nojquiya xiquinmaca miyac tlatzacuiltili hasta mocahuas para ininconehua.