Melkahka Kan 144:2-15

²Ih me silepei oh soundoarepei, ei wasahn ruk oh sounkomourpei, me I kin koapworopworki mehlel. Ih me ketikidiong wehi kan pahn ei manaman.

³Maing KAUN, dahkot aramas pwe komwi en kin ketin tehk; dahkot aramas, pwe komwi en ketin kupwukupwure?

⁴Aramas rasehng kisin tumwenieng; rahn akan en eh mour rasehng mwete me kin mwadang sohrala.

⁵Maing KAUN, komw ketin ritingada pahnlahng oh ketidihdo; komw ketin sair nahna kan, re ahpw pahn kakusada ediniei.

⁶Komw ketin kadarpeseng lioal oh katangapeseng sapwellimomwi imwintihti kan; komw ketin kadar sapwellimomwi arep kan oh pwakihirailpeseng.

⁷Komw ketin kapahdihdo nin limomwi kan; komw ketin waikiehda sang nan kepin pihl loal wet, oh ketin kapitiehla; komw ketin doareiesang pahn manaman en mehn liki kan,

⁸me sohte mwahn kin lokaia mehlel oh pil kin likamw ni arail kin kahula.

⁹Maing Koht, I pahn koulkihong komwi koul kapw pwoat; I pahn kesengki nei arp oh kouliong komwi.

¹⁰Komw ketikihong nanmwarki kan manaman en powehdi oh ketin kapitala sapwellimomwi ladu Depit.

¹¹Komw ketin doareiesang imwintihti lemei kan; komw ketin kapitiesang pahn manaman en mehn liki kan, me sohte mwahn kin lokaia mehlel oh pil kin likamw ni arail kin kahula.

¹²At tungoal pwutak kan ni ar pwulopwul re en rasehng kisin tuhke kan me kin keirda kehlail. At tungoal serepein kan en rasehng uhr inen kan me kin kalingana keimw en tehnpas akan.

¹³At tungoal imwen nahk kan en direkihla soangen wahnsahpw koaros. At tungoal pelin sihpw kan en naitikihada kiden sihmpwul.

¹⁴At tungoal pelin kou kan en neitik oh tohtohla sohte emen rehrail me pahn iohla, de salongala. Ngilen paisuwed en dehr pwarada nanial en at kanihmw kan.

¹⁵Meid pai wehi me ahneki soahng pwukat koaros; meid pai aramas akan me arail Koht iei KAUN-O!