Gesami Hea:su 144:2-15

²E da na gagulasa amola na gaga:sa. E da na ougiha aligisu dunu esala, amola na gaga:su dunu esala. Na da se mae nabawane hahawane masa:ne, Ea hou dafawaneyale dawa:sa. E da niha fifi asi gala banenesisa

³Hina Gode! Osobo bagade dunu ilia da hamedei agoai galebe. Dia abuliba:le ilima asigibala:?

⁴Ninia da fo fonomene agoai ba:sa. Ninia esalebe eso da baba bobaligilalebe agoai ba:sa.

⁵Hina Gode! Mu gadelale fasili, gudu sa:ima! Goumi digili ba:ma! Amasea, goumi da mobi bubugilalebe ba:mu.

⁶Dia ha lai afagogoma:ne, ha:ha:na gala:su iasima. Dia ha lai dunu hobeama:ne, dadia gala:le se bobogema.

⁷Na da hano lugudua mogo sososa. Dia gadodili, lobo ligia guduli, na hiougia gadoma. Ga fi dunu ilia gasaga na hasalasa:besa:le, Dia gaga:ma.

⁸Ilia da dafawane sia: hamedafa sia:sa. Amola ilia hamomusa: ilegele sia:sea, ogogosa.

⁹Gode! Na da Dima gesami gaheabolo hea:mu. Na da sani baidama dusa, Dima gesami hea:mu.

¹⁰Di da hina bagade ilia ha lai hasalasima:ne hamosa. Amola Dia hawa: hamosu dunu Da:ibidi gaga:sa.

¹¹Na dodona:gi ha lai dunu da na osa:la heda:sa:besa:le, Dia na gaga:ma. Ga fi dunu ilia gasaga na hasalasa:besa:le, Dia gaga:ma. Ilia da dafawane sia: hamedafa sia:sa. Amola ilia hamomusa: ilegele sia:sea, ogogosa.

¹²Ninia dunu mano ayeligi amolali, da ha:i manu bugi nasegagini heda:be agoai ganumu da defea. Amola ninia idiwilali, ilia da noga:le lelu duni bugi amo da hina bagade ea diasu hegomaia nina: hamonanebe, amo agoai ba:mu da defea.

¹³Ninia liligi legesu diasu ilia ha:i manu amoga nabai ba:mu da defea. Ninia sibi amo da nasegagi sogega esalebe, ilia mano osea:idafa lalelegemu da defea.

¹⁴Ninia bulamagau da mae daba:me asili, mano osea:idafa lalelegemu da defea. Ninia moilai logo ganodini, se nabasu wele sia:su hame nabimu da defea.

¹⁵Fifi asi afae da amo hou ba:sea, hahawane bagade ganumu. Amola ilia da Hina Gode amo ilia Godedafa ilegesea, ilia da hahawane bagade ganumu.