Megwewali 12

1

2

3

4

5

6

7

8

9

10

11

12

¹Tentenuzi nu is Midlimbag kenikew mintras betan-en ke pa, zutun te kenè pa egkeuma is timpu te kelised he zutun ebpekekaǥi ka te, “Wazà a melipey kayi te kebpengungubpaan ku.”

²Tentenuzi nu sikandin te kenè pa ebmerusirem diyà te kenikew is kerayag ta andew, bulan wey menge vituen, wey kenè pa ebmerusirem diyà te kenikew is nekeliǥuy kenikew he henduen be te layun ebmerusirem tenged te ǥapun.

³Egkeuma is andew he zutun ebpengerkeren en is menge vekelawan nu wey ebmeluye en is menge paa nu. Ne kenè en ebpekesepà is menge ngipen nu su pira zà he leǥas, ne is menge mata nu kenè en utew ebpekaahà.

⁴Is menge telinga nu ne kenè en ebpekepurung ebpekezineg, te minsan keǥurub te ǥelingan wey kegkaǥi te menge tagbis etawa sunata.

⁵Egkahandek ke en he ebpenekezeg etawa edhipanew ziyà te kersada. Ebmeputì en is menge vulvul nu ne egkaawè en is arig nu. Ne te huziyan he timpu ebpekehendiyè ka te lugar he iyan egkeubpaan nu te wazà pidtemanan, ne mezakel is egkeseeng kenikew ziyà te menge kersada.

⁶Umbe, tentenuzi nu is Megbevayà te wazè ke pa mebpatey, zutun te kenè pa egkevidtew is pelata he kedina wey kenè pa egkaawa is bulawan he teleǥuey, etawa zutun te kenè pa egkevidtew is hiket te tivud he idsekilut diyà te teheb, ne egkerupet haazà is tivud.

⁷Edlikù ka ziyà te tanà he iyan mibpuunan nu, ne sikan is gehinawa he mibeǥey kenikew te untung ne edlikù diyà te Megbevayà he iyan mibeǥey kayi.

⁸Siak is megwewali egkaǥi te, “Wazà iyan pulus! Wazà iyan pulus kayi te langun!”

⁹Uluwanen haazà is megwewali ne kenà iyan dà sikandin mibpulus te ketau zin, su impenurù din diyà te menge etew is netuenan din. Mibpurungan din istudyuwi is menge erubasa ne impelastar zin haazà kayi te surat din.

¹⁰Midtinguhè din he meǥamit din is hustu he menge lalag, ne hustu wey tutuu is insurat din kayi.

¹¹Is menge lalag te uluwanen he etew iring te medidis he tuked te pereelima te menge uyaǥen he egemiten din te kegiya zuen te ebpen-elimahan din, wey iring daan heini te ransang he ebpurung ed-uteng. Imbeǥey heini te Megbevayà he iyan perevantey kenitew.

¹²Mamà, heini pa is ibpetizaan ku kenikew: Kenà egkepangkus is kedsurat te menge velesahan, ne mekeveveley kenikew is kebpurung ked-istudyu.

¹³Ne ǥuntaan te nevasa nu en heini is langun, ne iyan heini penapus he egkeǥiyen ku kenikew: Tehuza nu is Megbevayà wey tumana nu is menge suǥù din, su iyan heini ketengdanan te kada etew.

¹⁴Su edhukuman kiw te Megbevayà pinaaǥi te langun he menge vaal tew, meupiya etawa mezaat, ragkes en is meeles is ked-ul-ulaha tew zuen.