Marko 10

1

2

3

4

5

6

7

8

9

10

11

12

13

14

15

16

¹Ma i tut ma i vana ta ra langun Iudaia ma ta ra papar Iordan maro; ma ra tarai dia kor mulai tadav ia; ma i tovo mule diat da kana mangamangana iat.

²A umana Parisaio dia tadav ia, ma dia tir ia: I takodo bar ba ta tutana na vung vue kana vavina? Dia valar ia ka.

³Ma i tir diat: Ava ra varkurai Moses i ga tul tar ia ta vavat?

⁴Ma dia biti, Moses i nur tar ia ba da tumu ra buk na pala varbean, upi da vungue.

⁵Iesu i biti ta diat: I ga tumu go ra vartuluai, tago i leo ra bala i vavat.

⁶Ma papa amana ra turpaina vavaki, i ga vaki dir upi a tutana ma upi a vavina.

⁷Kari a tutana na vana kan tamana ma nana, ma na ki tukum pire kana vavina;

⁸ma dir par, dir tikai ka upi koko dir a ivut mulai, dir tikai ka.

⁹Nam ba God i kubu guve, galiaka ta tutana na pala ia.

¹⁰Kana tarai na vartovo dia tir mule na pal ta go ra magit.

¹¹Ma i tatike ta diat: Ba tikai i vungue kana vavina, ma i taule ta ra tikai, dir po muka;

¹²ba ra vavina i vungue kana tutana, ma dir taulai ma ta ra tikai, ia bula i po muka.

¹³Dia kap ra umana bul ikilik tadav ia upi na bili diat, ma ra tarai na vartovo dia tigal diat.

¹⁴Ba Iesu i gire, i kankan ma i biti ta diat: Avat a nur vue ra umana bul ikilik upi diat a tadav iau; koko ava tigal bat diat, tago kadiat dia dari ra varkurai kai God.

¹⁵A dovot go iau tatike ta vavat ba: Nina ba pa i kapupi ra varkurai kai God da ra bul ikilik pa na olo muka tana.

¹⁶Ma i puak pa diat, ma i tata vadoane diat, ma i palagur diat ma ra ura limana.

¹⁷Ba i vanavana mulai na nga, tikai i vutvut tadav ia, i va timtibum pirana, ma i tir ia dari: Bo na Tena Vartovo, ava ina pait ia upi kaugu ra nilaun tukum?

¹⁸Iesu i biti tana: Dave u vatang iau ba iau boina? Pa ta i boina, ia kaka God.

¹⁹U nunure ra lavur vartuluai: Koko u vardodoko; Koko u po; Koko u long; Koko u varvai vavaongo; Koko u vatatanur ta magit kai ta tikai; Una ru tamam ma nam.

²⁰Ma i tatike tana: Tena Vartovo, go parika iau ga toratorom tana papa amana ba iau ga bul.

²¹Iesu i giragire ma i mari ia, ma i biti tana: A kopono magit boko u iba upi ia; una vana, una ivure kaum parika, ma una tabar ra umana luveana me, ma kaum boko ra bo na vuvuvung ra bala na bakut, ma una mai, una mur iau.

²²Ba i valongore go, i mata bibian, ma i tabun mat ra balana tana, tago i manga muka kana tabarikik.

²³Iesu i gigira vurvurbit, ma i tatike ta kana tarai na vartovo dari: I papait na dekdek tuna pire diat dia uviana upi diat a olo ta ra varkurai kai God.

²⁴Ma ra tarai na vartovo dia kaian ta go kana tinata. Iesu i tatike mule ta diat dari: A umana natugu, i dekdek tuna pire diat dia nurnur ta ra tabarikik upi diat a olo ta ra varkurai kai God.

²⁵A niolo kai ra uviana ta ra varkurai kai God i manga dekdek ta dir ma ra nidolo kai ra kamel ta ra mata na ingingit.

²⁶Ma dia kakaian mat, ma dia tatike tana: Ba damana, ia vang da valaun ia?

²⁷Iesu i bobobe diat ma i biti: A tarai pa dia pait valar pa ia, ia kaka God, tago God i pait valar pa ra lavur magit parika.

²⁸Petero i tatike tana dari: Ave ga vana kan ra lavur magit parika, ma ave murmur u.

²⁹Iesu i biti: A dovot go iau tatike ta vavat: Ba tikai i ga vana kan ta pal, ba kan ra umana turana, ba ra umana taina, ba nana, ba tamana, ba ra umana natuna, ba kan kana gunan upi iau, ba upi ra bo na varvai,

³⁰ta go ra nilaun da tul tar ra mar na pal tana ma ra mar na turana, ma ra mar na taina, ma ra mar na nana, ma ra mar na natuna, ma ra mar na gunan, ma ra kinadik bula, ma ra nilaun tukum namur.

³¹Ma mangoro dia lua, diat a kabila murmur, ma diat dia murmur, diat a kabila lua.

³²Dia vanavana boko na nga urama Ierusalem, ma Iesu i lualua ta diat, ma dia kakaian, ma diat dia murmur dia burut. Ma i ben vaire pa mule ra vinun ma a ivut, ma i ve diat ta ra lavur magit ba na tup ia boko, dari:

³³Go da vana urama Ierusalem, ma da tul tar Natu i ra tutana ta diat a umana tena tinabar ngalangala ma ra umana tena tutumu; ma diat a kure tar ia upi na virua, ma diat a tul tar ia tai ra umana Tematana;

³⁴ma diat a kulume, ma diat a gami ia, ma diat a virit ia, ma diat a doka, ma ona na par ta utul a bung na laun mulai.

³⁵Iakobo ma Ioanes, a ura natu i Sebedaio, dir tadav ia, dir biti tana dari: Tena Vartovo, amir mainge ba una pait tar ia ta mimir nina ra magit ba amir a lul upi ia.

³⁶Ma i tir dir ba: Ava amur mainge ba ina pait ia ta mumur?

³⁷Dir biti tana: Una tul tar amir ba amir a ki piram ta kaum minamar, tikai ta ra limam tuna, ma ta ra tikai ta ra mairam.

³⁸Iesu i biti ta dir: Pa amur nunure ra magit go amur lul ia. Dave, na tale amur upi amur a momo ta ra la ba ina momo tana, ba da baptaiso amur vang ma ra baptaiso ba da baptaiso iau me?

³⁹Ma dir biti tana: Maia. Iesu i tatike ta dir: Ioi, a la ina momo tana, amur bula amur a momo boko tana; ma ra baptaiso di baptaiso iau tana, da baptaiso amur bula tana;

⁴⁰ia kaka ra kini ta ra limagu tuna, ba ta ra mairagu, vakir kaugu upi ina tul tar ia; kadiat iat di ga vaninare upi diat.*

⁴¹Ba ra vinun dia valongore, dia kankan ure Iakobo ma Ioanes.

⁴²Ma Iesu i oro pa diat pirana, ma i tatike ta diat: Ava nunure ba diat di vatang diat tena varkurai ta diat ra lavur vuna tarai, dia manga papait na luluai ta diat, ma kadia umana ngalangala dia kure vamat diat.

⁴³Ma pa i damana pire vavat; nina i mainge na ngala ta vavat, na tultul uka pire vavat,

⁴⁴ma nina i mainge na lualua ta vavat, na vilavilau pire vavat parika.

⁴⁵Tago Natu i ra tutana pa i ga pot upi da toratorom tana, i ga pot upi ia iat na toratorom ma upi na tul tar kana nilaun upi ra varkul ure ta mangoro.

⁴⁶Ma diat pot aro Ieriko; ma ba diat ma kana tarai na vartovo ma ra kor na tarai bula, dia vanavana oai maro Ieriko, natu i Timaio, a iangina Batimaio, a tena nilul i pula, i kiki ra papar a nga.

⁴⁷Ba i valongore ba go Iesu ra te Nasaret, i oraoro, i biti dari: Iesu, u natu i David, una mari iau.

⁴⁸Ma mangoro dia tigal ia ba na ki mut uka; ma i manga oraoro ko: U natu i David una mari iau.

⁴⁹Iesu i tur uka, ma i biti: Avat a oro pa ia. Ma dia oro pa ra pula, dia biti tana: Una gugu, una tut, i oro pa u.

⁵⁰Ma i vue kana olovoi, ma i pil, ma i tadav Iesu.

⁵¹Ma Iesu i tir ia: Ava u mainge ba ina pait ia tam? A pula i tatike tana: Luluai, ba ina nana mulai.

⁵²Iesu i biti tana: Una vana ka, kaum nurnur i tar valaun u. Ma i nana vuavuai mulai, ma i mur ia na nga.