1Damanina ba Iesu i dagui maibai i bisisiya kurisi, i wona, “Mara kesana sebare ana tano i garai ba wine pesina i baoni, ba uwana kana gudaguda doguna i karoi, ba kana aba kibukibu yovena i bowai. Ba saibisaibirisi mutusi i maisanisi, kata baona sita potai, ba kona i tauya i bowagawaga.
2Ba boyauna marana i botu wai, baona sebarena ana saibisaibirina kesana i porai kata wine uwana mutuna sita berei.
3Saba kosi si botawani, si ravi ba yaro kabana si pora taveyei.
4Damanina ba ana saibisaibirina yebo kesana i porai kurisi, ba kosi sebarena gayamina si ravi ba wose goyogoyosi si wosei kurina ba si kaobibisakei wai i sinimaya saki.
5Ba yebo kesana i pora meyei wai, kona si kasibunui. Ba pesarisi i poraisi, wai mutusi si ravisi, ba mutusi si kasibunuwana.
6Ba pipiya kesana ikei, i mamana iti porai, natuna i nuwayauyauni kata kona i pora koboi i wona, ‘A kuiri niko natuku wai sina bokuwayei.’
7Saba kosi si kaoboneyana si wona, ‘Nikona wai bao badana natuna, ko botu tana kasibunui ba niko bao wai ini kariti yai.’
8Damanina kosi natuna si yauni, si kasibunui, ba ku bao kupuna tupuwina si garu kasibauei.
9Kata bao badana awaika ina wosei? Ina botu wai bao aba potapotasi ini kasibunuwana ba baona wai pipiya mutusi ina berisi.
10Niko wona ko kuiri kona? ‘Kata yove bowabowa biyisi akima si sinikikiyei wai karaku i akima kaimasawina.
11Ba nikona Bada ana wose ba kana kinana kurita wai i nuwarubaruba saki.’”
12Damanina ba Jew babadisi keta si nuvenuveni kata mekabage Iesu sita patumi, kairavina kosi si kuiri kata maibai kosi i wonewonisi, saba koroto si nagarisi wai si boterei ba si nae.
13Muri yai Pharisee biyisi ba Herod ana pipiya mutusi si poraisi kata Iesu awaika iti sisiyana goyoi wai sita patumi.
14Si botu kurina ba si wona, “Bibeyebeyena biyim, ka kuiri kom bibisuwonim, ba kega kotoi murinai ke bimsiri bagunai wata kotoi, saba God ana keta damana, ke bibeyebeyena wai igaire saki. Ke wonikai Caesar tax kana berei wai damanina kona?
15Ba tax kani maisa kona kega?” Saba Iesu asi kwaruma i kuiri wai i wona, “Awaika kairavina ko bikae botaina? Denarius ko yauni ko botuwei ana kinani.”
16Kata kosi denarius (mane) si yauni si botu, ba i toirubaisi i wona, “Nikona kotoi gubana ba kotoi kana waba?” Ba kosi si kaobeyei si wona, “Caesar.”
17Damanina Iesu i wona, “Awaika Caesar karinai wai yebo Caesar ko berei, ba God karinai wai yebo God ko berei.” Nikasike i kaobeyisi wai si wareyei.
18Damanina Sadducee biyisi iyabosi te wonawona kata bomsiri mena kega wai si botu Iesu si torubai.
19Si wona, “Bibeyebeyena biyim Moses kairavikai i kiruma kata sebare natunatuna kega, ina rabobo ba kaowana i sumarei wai, teina soberena ina rabai kata tuwana kairavina ini tuwa.
20Mara kesana sebasebare asi 7, kata iyarokona i tabine wai natunatuna kega ba i rabobo.
21Ba kana kasitawana soberena i rabai, ba yebo natuna kega ba i rabobo. Ba kasibitonu yebo wosena kesanina kurina i tupuwa.
22Kata ereonowasi asi 7 kega ere natunatusi ba si rabobo ba muri yai wai wasikena yebo i rabobo.
23Kata wasikena asi 7 si rabai ba raoboraobosi asi bomsiri mena maranai wai, kaowana damana wai kotoi?”
24Iesu i kaobeyisi i wona, “Komi koi su siwana taveyana! Basuna komi God wonana ba ana maragata ko biburuburuwei.
25Maranai raoboraobosi sina bomsiri wai, kosi nanakasike bage aneaneya sapamai, ba namai wai tabine kega.
26Ba karaku ani beyimi kata raoboraobosi asi bomsiri mena wai bisuwona. Komi Moses ana bukai dipa karakarasina rurutuwina ko baiyavi kona kega? Mekabage God i wonei, ‘Yauku kona Abraham, Isaac, ba Jacob asi God.’
27Kona God wai kega raoboraobosi asi God saba yawayawasisi asi God. Koi su siwana taveyana!”
28Kairuwana bibeyebeyena biyina kesana i botu ba si bikaoboneyana wai i nonorisi, ba Iesu Sadducee biyisi i kaobeyei kabitamnisi wai, i toiruba, “Kairuwana ereonowana kamonai wai mekona i rakata saki?”
29Ba Iesu i kaobeya i wona, “Nikona i rakata saki, ‘Ko nonori, Israel biyimi, Bada ata God ikesina wata Bada.
30Bada am God nuwanuwam tupanai, pipiyim tupanai, am nota tupanai, ba am maragata tupana ki nuwayauyauni.’
31Ba bairuwaina wai nikona, ‘Maturam ki nuwayauyauni, nanakasike bage kom ikesim ke binuwayauyaunim.’ Kega memena kaotunetune kesana nikosi ruwamo i getawanisi.”
32Saba sebarena i kaobeya i wona, “Bibeyebeyena biyim, ku wona kabitam kata, God kesana ba kega memena kotoi, saba ikesina wata.
33Ba nuwanuwam tupanai, am kuira tupanai, am maragata tupanai God ki nuwayauyauni, ba yebo maturaturam ki nuwayauyaunisi nanakasike bage ikesim ke binuwa yauyaunim. Nikona wai i rakata saki, kega bage suwara kapukapunina ba puyobunuwa.”
34Iesu i kinani kata i kaobeyana kabitam wai, i wona, “Kom God ana basileiya gwabinai damana ke mamana.” Ba kona murinai kega kesana kotoi i wose rubai kata Iesu ita toirubai.
35Iesu God ana yove taparoro kamonai i bibeyebeyena maranai i toiruba i wona, “Mekabage wai kairuwana bibeyebeyena biyisi si wona, kata Keriso kona David natuna.
36David ikesina mom Kanuma Kaobaisiyenai i sisiya i wona, ‘Bada au Bada kurina i wona, “Kasuku ai ke makira, yepo kam abiya ku kae gaburim ana terisi.” ’
37Ba David ikesina Iesu i yorei, ‘Au Bada.’ Kata mekabage Keriso ai, kona natuna?” Kata koroto kaikapona ere nuwagairesi si tainabaenegei.
38Iesu i bibeyebeyena maranai i wona, “Kairuwana bibeyebeyena biyisi ko kita kabitamnisi. Kosi asi waina kasi gara veoromisi sina kote ba sina yewoyewo ba bigimona gawarisi yai pipiya ere bokuwayisi sini bikaikaivisi.
39Ba dugu yovesi yai asi aba makimakira kaimatanisi ba poraga marasi yai asi gawara gaigairesi te binebinena ba te makimakira.
40Kosi sobesobere karisi yai tebo pisipisikara ba biwareyisi kairavina asi pari veoroma goyosi. Nikosi pipiya asi saroba wai i goyo saki.”
41Iesu puyo gawarina parinai i makira ba koroto ibo kibukibuisi ba asi puyo God ana yove taparoro kabominai si tutaura. Pipiya marimariyisi pesarisi yebo mane kaikaposi si tutaura ku kaboma.
42Saba sobere moyamoyakina i botu ba coin yogiyogisi asi ruwamo, 2 toea rubana i wanisi.
43Iesu ana nonorayauna i yorisi si botu kurina, ba i wona, “Yauku a bisuwonimi kata, niko sobere moyamoyakina ana puyo ku kaboma i terei wai i rakata saki, kega bage ereonowasi.
44Kosi ereonowasi asi mariya nununai si berena ba kona wai nao yogiyogina ikei ana bokwarakwara kamonai awaika tepanai ita mana wai ereonowana i tere roboi.”
