Mark 11

1

2

3

4

5

6

7

8

9

10

11

12

13

14

15

16

¹Ba si verakasibau ku Jerusalem maranai, si botu ku Bethphage ba Bethany meyagisi ba Olive koyanai Iesu ana nonorayauna ruwamo i poraisi.

²Ba i wona, “Ko nae nao ku meyaga naoti yai koni bisukaibau maranai donkey sebare yogiyogina kega kesana kotoi i geru rubai nai si kausi wai kona panani. Ko tombauni ba kona botuwei nikei.

³Ba kotoi wata ina toirubami ina wona, ‘Awaika kairavina nikona ko wosewosei?’ Ko wonei, ‘Kata Bada e waiwainei, mara yoginaikei. Ba yebo yagiyagina kani porai ina veramaga.’”

⁴Damanina ba si nae wai donkey ketai yove matam ketanai si kausi si kitai wai si tombauni ba,

⁵pipiya mutusi nai si bimsiri wai si toirubaisi si wona, “Awaika kairavina donkey ko tombauni?”

⁶Saba kosi Iesu i wonisi wai nanakasike si kaobeyisi. Damanina ba si boterisi si nae.

⁷Maranai donkey si botuwei Iesu kurina wai, kasi tarasowo si garu gegeyana ku tepana, ba Iesu i geru.

⁸Ba pipiya pesarisi kasi tarasowo ketai si yabara, ba mutusi wai keyama ragaragasi ere rurausi dipai si tara wai si yabara.

⁹Ba iyabosi si nao si nenae ba murinai si kibikibi wai si paraparara, “Hosana Bigairenina! Kona Bada kana wabai e botubotu.

¹⁰Bibigairenina, kona tamata David ana basileiya e botubotu, Hosana kau kaidamona.”

¹¹Maranai Iesu i nae ku Jerusalem wai, i riu God ana ku yove taparoro. Ba sawara ereonowasi i kita nanaga, saba kao i kakaba kairavina ana nonorayauna yabata si kasibau si nae ku Bethany.

¹²Mara i tom wai Iesu ana nonorayauna yabata Bethany si kasibau taveyei, si veraveramaga ku Jerusalem wai Iesu soya i rabobo.

¹³Ba koveya rurauna rabarabai i kinani wai i nae ku gwabina saba rurauna wata i kinana kairavina kega koveya kana mara ba ita uwa.

¹⁴Damanina ba Iesu kurina i wona, “Kom kega kesana kotoi uwam ina kam meyei.” Kata ana nonorayauna si nonori.

¹⁵Maranai si verakasibau ku Jerusalem wai, Iesu i riu God ana ku yove taparoro ba i dagui iyabosi namai si bigimogimona wai i rukwabina si kasibau, ba pipiya mane si bibobereyana God ana yove taparoro suwara kairavina.

¹⁶Ba kega kesana kotoi i boterei kata bigimogimona sawarisi ita kabara ita riu God ana ku yove taparoro kamona.

¹⁷Ba yebo i beyebeyisi wai i wona, “Matapa si kirumi kata, ‘Au yove sina yorei dam ereonowasi asi pari yovena.’ Saba komi ko wosei ‘bage pisipisikarisi asi aba kobakoba.’”

¹⁸Priest kaikaiwabosi ba kairuwana bibeyebeyena biyisi nikona si nonori saba, kosi si nagarei basuna pipiya ereonowasi ana giu si nonori wai si wareyei.

¹⁹Ba i rabisi wai, Iesu ana nonorayauna yabata meyaga kaikapona si kasibau taveyei.

²⁰Didibarai, si yewo si nenae wai, koveya keyamina si kinani, warowaronai ba i gae ku damona i bosivisiviyei.

²¹Peter i notapanani wai Iesu kurina i wona, “Bibeyebeyena biyim ke kinani nao koveya ku kaonawai wai i rabobo.”

²²Saba Iesu i kaobeyei, God ki tumaganei.

²³A bisuwonim kotoi wata niko koya kurina ina wona, “Ke nae ikesim ku enaga ki garu kirena meyim.” Ba nuwanuwanai kega ina nota kabakaba saba ini geruwana kata awaika i wonei wai, wosena ina wosei ba kairavina ina tupuwa.

²⁴Kona kairavina a wonimi, awaika wata kairavisi kuna rupari ba kuni baba wai, ki geruwana kata matapa ku yauna, ba ini karimi yai.

²⁵Ba ku msiri ke raupari maranai kotoi wata ana goyona ke botawani wai ke notataveyei kata Tamam sapamai am piragagoyosi yebo ina notataveyisi.

²⁶Ba kom pipiya asi piragagoyosi kega kuna notataveyisi wai, Tamam sapamai am piragagoyosi kega ina notataveyisi.

²⁷Kosi si verakasibau mena ku Jerusalem, ba Iesu God ana ku yove taparoro kamonai i yewoyewo wai priest kaikaiwabosi ba kairuwana bibeyebeyena biyisi, ba Jew babadisi si botu kurina ba,

²⁸si toirubai, “Memei maragata ku yauna wai nikosi sawara ke wosewose, ba kotoi maragata i berim wai nikosi wose ke wosewose?”

²⁹Iesu i kaobeyisi, “Baitoruba kesana ana berimi, ba kona kaobeyiku wai, ana wonimi. Kata kotoi maragata i beriku wai nikosi wose a wosewose.

³⁰Ko woniku kata John ana maragata memei i yauni wai i babataito, sapamai kona pipiya karisi yai?”

³¹Saba kosi i kesisi si kaoboneyana si wona, “Memei bage tana wona, ‘Sapamai wai.’ Ini toiruba kata, ‘Awaika kairavina kega koi geruwei?’

³²Ba memei bage tana wona, ‘Pipiya karisi yai wai’…” Pipiya si nagarisi, kairavina ereonowasi si kuiri kata John kona bisuwona peroveta.

³³Kona kairavina Iesu si kaobeyei si wona, “Yakai kega ka kuiri.” Iesu yebo i wona, “Yauku yabata kega ana wonimi kata memena maragata a yauni wai nikosi wose a wosewose.”