Maleko 6:30-55

³⁰Tau faꞌona wasawasa sa fuyoma be maꞌedi Yesu sa faꞌoigogo be somo sa ginaulidi yo edi lau faꞌata wasadi ena sa liba.

³¹Yesu maꞌana hewahewali hige edi solasola haba ti kalahe paꞌana dodoga boludi sa lau yo sa laoma. Yo fede iyebom, Ta lau nuꞌu laulau gesa yai, be ainiya au anyawasi.

³²Yo fede waga yai sa awa modigafu na sa lau atiꞌatipu hesa yai.

³³In moho dodoga boludi sa ita lobahidi be taon mahudoꞌidi yai sa tafo bwaꞌibwaꞌi be sa mahano bwaꞌi.

³⁴Waga ya mahano Yesu ya tulubeꞌu yo fede baiwa ya itadi be ya nuwatohatohaedi. Paꞌana itaꞌitadi doha sipi hige tau ita watanidi na sa laulau koko. Logena ginauli boludi ya fatubu ya fatalahadi.

³⁵Ya maimailafi yo fede tau famuli watanina sa laoma lisina be tiyen, Ita itete balabala gaibu yai.

³⁶Dodoga te u duidi ti lau nuꞌu mulimulina yai kalahe adi ti unedi.

³⁷Na Yesu alinadi ya bui iyebom, Umi kalahe au feledi. Tiyen, Wa fanuha bena siluba handele luwaga ꞌe abidi be fwalawa ꞌe unedi na ꞌe fakalahedi?

³⁸Yo fede Yesu ya fatiꞌoidi iyen, Fwalawa fisa? Haga au lau au yoꞌo. Sa yoꞌo be sa fuyoma tiyen, Fwalawa faligigi yo hama luwaga.

³⁹Yesu ya libalau tau famuli watanina lisidi iyen Dodoga au falibadi, be ti taꞌai pwalupwaluidi ai hawahawa.

⁴⁰Yo fede haisa oulidi 100 sa taꞌai, na haisa oulidi 50.

⁴¹Habahim Yesu fwalawa faligigi yo hama luwaga ya abidi na ya itaꞌita hasa galewa na ya faloholohodi. Fwalawa ya ifidi, na hama luwaga ya kampwaidi be tau famuli watanina ya feledi sa soiyedi dodoga mahudoꞌidi lisidi yai.

⁴²Mahudoꞌidi sa kalahe be bogadi sa yahayaha.

⁴³Habahim tau famuli watanina fwalawa yo hama antoledi sa tano gogoidi be noho 12 sa famohafudi.

⁴⁴Tatau sa fakalahedi ouꞌoulidi 5,000.

⁴⁵Yesu tau famuli watanina ya duidi be feula waga yai sa awa na sa dohe Betesaida. Na muli yai baiwa ya duidi.

⁴⁶Ya lautoꞌiyedi mulina yai, ya finahe hasa tuꞌa yai be ya lauꞌuꞌula.

⁴⁷Toutou bulu yai mate waga haꞌa gabogabo atipuna yai, na Yesu mate iyabona fote yai.

⁴⁸Tau famuli watanina ya itadi mate sa fulufuluga afuledi bena waga sa lefaꞌen paꞌana hwayau sa tulu matai. Hola hige i ifi tatatali, gabogabo hewana yai ya lau lisidi. Bena ya bayawaidi,

⁴⁹na sa itaꞌita lau be sa ita gabogabo hewana yai ya laulau. Edi nuwatuhu bena haga onaꞌonaha, be sa ꞌwalaꞌwalaui.

⁵⁰Mahudoꞌidi sa ita be sa ꞌwasabu wananaha. Yo fede Yesu ya libalau lisidi iyebom, Nuwamiu ti adidili! Tabu au ꞌwasabu, Yau!

⁵¹Yo fede ya awalau waga yai na hwayahwayau ya towa motu. Tau famuli watanina edi noꞌo sa ofi.

⁵²Nuwadi sa lau fabui homodi, paꞌana 5,000 ya fakalahedi aniyona wananahana hige ti nuwatu lobahi.

⁵³Sa dohe Genesaleta nuꞌuna yai, amainiya edi waga sa ankai.

⁵⁴Sa tulubeꞌu, yo fede dodoga Yesu sa ita lobahi.

⁵⁵Wasana sa atahiyen in somo yai, mate feula sa lau nuꞌu ouꞌouli yai be tau asiꞌasiyebo edi aba laulau eno yai sa baheidima lisina.